Hamba 2018 nokufa kwakho
UNYAKA esiwuphethayo ube nosizi nomunyu embonini yezokungcebeleka njengoba kudlule inqwaba yabagqamile kulo mkhakha. Okwenze kwezwela kakhulu wukuthi izigameko zokushona kosaziwayo zenzeke zathothelana eduze kanti unyaka uvulwe ngakho ukufa waze wazovalwa ngakho.
Sesiwugoqa unyaka singasho ukuthi ubunzima u-2018 ngokuthatha amaciko ethu kanti okwenzekile kucacisile ukuthi isisho esithi umhlaba kawunoni siyiqiniso.
Nakuba kubuhlungu ukudlula kwamaciko ethu kodwa okuhle wukuthi imisebenzi yamanye isele ngemuva ikakhulukazi abaculi. Esife olwembiza ngabo ngabalingisi nabasakazi.
UQALWE kabi unyaka kudlula emhlabeni ingwazi yomculo wejazz ebiyaziwa umhlaba wonke uhugh Masekela zingama-23 kuMasingana (January). Ubeneminyaka engu-78 ethathwa ngumdlavuza nebese kuyisikhathi umbambile kusukela ngo-2008.
U-2016 kube wunyaka onzima kuye ephuma engena esibhedlela ngemizamo yokukhalima lesi sifo. Mude kakhulu umlando wakhe njengoba eqale ukufutha icilongo eneminyaka engu-14 kodwa ugqame kakhulu emhlabeni ngezingoma azenze kusadlange ubandlululo eningizimu Afrika, naye esekudingisweni.
KUYO le nyanga yokuqala onyakeni kulandele umlingisi usandy Mokoena eneminyaka engu-68. Ushone emuva kwezinsuku ezimbili kudlule ubra Hugh ngomhla ka-25. Usandy ugqame kakhulu kwabaningi elingisa kwiscandal kwi-e.tv engubra Eddie. Bese kuphele iminyaka engu-13 elingisa le ndawo.
Miningi eminye imidlalo yethelevishini alingise kuyo njengegenerations yodumo, Khululeka, Soul City, Going Up, Yizo Yizo neminye. Uyaziwa nasemidlalweni yasesiteji njenge-ipi Tombi.
U-FEBRUARY uvule ngodavid Phetoe oshone eneminyaka engu-85. Abaningi bamazi elingisa indawo kapaul Moroka kwiGenerations yodumo yokuqala. Bese kuyisikhathi eside ebanjwe wukugula. Ubegqamile futhi emdlalweni isgudi Snaysi, Going Up nakwifilimu icry, The Beloved Country.
OKE waba ngumsakazi wemotsweding FM nenorth West FM uchris Matshaba ushone esekhona ezinhliziyweni zabaningi nakuba ebesengusomabhizinisi. Ushone mhlaka-11 kufebruary eneminyaka engama-40.
Obekumenza agqame futhi wukuthi ubeshade nomlingisi utsholofelo Monedi ogqame ngendawo ayilingisayo kameme emdlalweni imuvhango. Naye ushone ngemuva kokubanjwa wumdlavuza isikhashana.
KUSHAQEKE abaningi kudlula emhlabeni u-akhumzi Jezile engozini yemoto mhlaka-28 Mbasa (April) eneminyaka engu-29. Ugqame engumethuli wezinhlelo zeyotv esemncane kanti ushona nje bese engumdidiyeli nomethuli wezinhlelo nomlingisi. Uze wahlomula nangendondo KUMA-SAFTA ngo-2014 ngokulingisa ungulube emdlalweni itempy Pushas. Kuyo le ngozi kushone nomculi usiyasanga Kobese nomlingisi uthobani Mseleni.
UMKHAKHA kamasikandi ugqemeke engeqiwa ntwala kudlula emhlabeni umjikijelwa “Ichalaha Likashafuza” Sbongiseni Ngubane mhlaka-25 kunhlaba (May) eneminyaka engu-35. Bese kuyisikhashana ebambekile kanti nemidlalo abonakale enandisa kuyo ngaphambidlana kokudlula emhlabeni ubenandisa khona ebambekile. Namanje ziseningi izinkulumo ngokudlula kwakhe.
UKUDLULA emhlabeni kukaLinda Mkhize obedume ngelikaProkid noma unumber 1 Soweto Boy mhlaka-8 kuncwaba (August) kunyakazise abaningi nalabo abangahlangene nalolu hlobo lomculo abelwenza i- hip hop.
Obekumenza abe yintandokazi wukuba ngowokuqala ukugqamisa lo mculo esebenzisa ulwimi lwebele kanti phambilini bekuduma o“yo My Man”. Ushone eneminyaka engu-37. Kakumangazanga ukuthi nomngcwabo wakhe usingathwe wuhulumeni, wafihlwa njengeqhawe ewestpark Cemetery lapho kulele khona amanye amaqhawe amaningi ezwe.
KUVUSE izinkulumo eziningi ukudlula emhlabeni kuka-owethu Enhle Gambushe mhlaka-15 kumandulo (September) obesanda kuvumbuka emdlalweni Imbewu: The Seed nawo obusanda kuqala kwi-e.tv.
Ubelingisa indawo kanonhlanhla. Ushone engozini yemoto cishe ngehora lokuqala ekuseni eneminyaka engama-22 nje kuphela nokuyikho okudale izinkulumo ezinkundleni ezahlukene.
NGAWO futhi umandulo mhlaka-25 kushone ushoki Mokgapa obengumlingisi ozibulele eneminyaka engu-34. Kubikwe ukuthi isizathu kube yingcindezi nokhwantalala. Ulingise emidlalweni eminingi okubalwa phakathi kwayo i-ashes to Ashes, Sokhulu & Partners, Intersexions kanti uze wahlomula ngendondo YESAFTA ngokulingisa kwifilimu yesibhunu ISINK.
UMFUMFU (October) uvule ngoRowena Baird obengumsakazi osemnkantshubomvu, oshone mhlaka-5. Iphimbo lakhe ligcine ukuzwakala ESAFM. Uke wasebenza emetro FM, Radio 2000 nakwichannel Africa.
NAMANJE isakhulunywa eyokushona kukajabulani Tsambo mhla ka-24 kumfumfu (October) obedume ngelikahip Hop Pantsula (HHP) noma ujabba. Kubikwe ukuthi uzibulele kanti kusolwe isizathu esifanayo nesikashoki esibe yimbangela yokuzibulala nakuba umndeni ungakaze ukuqinisekise lokhu.
Izigigaba ezithinte umbango emndenini ngemuva kokushona kwakhe nazo zibe sematheni njengoba nanamuhla isathamundwa indaba yakhe.
QAPHELA: BANINGI ABANYE ABASISHIYILE EMHLABENI KODWA SITOMULE LABA NGOBA OKWABO KUBE SEMATHENI
zowakha@ilanganews.co.za