Igeqa amagula ngaleli qembu
AKUBONAKALI lungaba khona olunye ucwaningo olungadlula lolo olwenziwe ngusydney Fetsie Maluleke, ngeqhaza lesoul Brothers, emculweni, nangempilo yamalungu alo.
Umlobi ube nenhlanhla yokuyithola yonke ingonyuluka ngesoul Brothers kumoses Ngwenya, okunguyena kuphela osesele kumalungu asungula leli qembu kudala, abanye bawo beseselokishini impumalanga, ehammarsdale, kwazise umoses uhlangane namalungu aleli qembu selisegoli lapho yena engowakhona.
Kule ncwadi umfundi kuningi azokuthola kuvela ngamazwi kamoses, njengokuthi wazi nomsuka wogqozi lwezingoma ezinye ezabe ziqanjwe ngudavid Masondo njengalena esihloko sithi Sibongile, naleyo alandelisa ngayo kamuva esihloko sithi: ‘Mama kasibongile’ - ezashisa izikhotha eziteshini zemisakazo eziningi nasezitolo zomculo.
Lena esihloko sithi: “Mshoza” nayo eyayibaba ha, yaqanjwa nguyena umoses “Black Moses”.
Umfundi futhi ubona nezithombe ezingakaze zishicilelwe ndawo nazithole kuye ublack Moses.
Kuyo le ncwadi, umfundi uthola ithuba lokulunguza abone impilo yangasese yalezi zilomo zomculo womgxobanyawo kanjalo nesahluko esibuhlungu ngomlando wazo njengoba kuyiqembu leli elingazange liqedwe wukuxabana njengeningi lamabhendi, kepha amalungu alo abeqedwa wukufa ngezingozi zomgwaqo.
Umlando wesoul Brothers uveza ukuxhumana kwawo namanye amaqembu omculo angaleso sikhathi, nokwenza encwadini eyodwa umfundi athole ijuphe ngesimo samanye amaqembu omculo.
Uma kukhulunywa ngesoul Brothers alisali igama lesilomo somsakazi ongasekho ucyril Bongani ‘Kansas City’ Mchunu obelibongela esiteshini Ukhozi FM, lusabizwa ngeradio Zulu, uma ezodlala izingoma zalo.
Naye-ke umlobi ekhasini elandulela isingeniso sale ncwadi uvula ngazo izibongo zesoul Brothers njengoba yabe ibongelwa nguye ucyril Mchunu.