Makuqhakanjiswe wonke amaqhawe emikhakha ehlukene
Babeqatha abashayisibhakela bakudala
KUSEMQOKA ukuba aqhakanjiswe wonke amaqhawe ngokwehlukana kwemikhakha, kungaqhakanjiswa nje kuphela abaholi bezepolitiki njengoba kuvame ukwenzeka.
Basebaningi abadla anhlamvana abathinteka kwamancane uma kuphathwa igama likajoseph Ngidi, isihlabani emdlalweni wesibhakela abalandeli abebemhasha bethi “Axe Killer”.
Ujoseph Ngidi yindoda ebikhulumela phansi, enogazi nethobekile, kodwa eba ngokunye uma isingene eringini. Yingakho nje bebembiza nge"Axe Killer”.
Ungidi ube yiqhawe okuxoxwa ngalo ngisho engakawabeki ethala amagilavu emuva kwezimpi ezingu-96 lapho ayebhekene nosaziwayo emdlalweni wamankomane.
Wazalelwa e-edendale emgungundlovu mhla ka-19 kumbasa (April) 1934. Walwa impi yakhe yokuqala njengomdlali okhokhelwayo ethekwini ngolwezi (November) 1954, lapho ashaya wathela othulini ubary Vandeyer.
Waphumelela ezimpini eziyisihlanu ezalandela lapho kwaze kwaba yilapho ehlulwa khona ngamaphuzu emizuliswaneni engu-8 ebhekene noherbert “Black Hawk” Hlubi. Lokho kwehlulwa kwakhe kokuqala, kwamkhuthaza ngoba wanqoba empini elandelayo ebhekene nogilbert Petros.
Walandelisa ngokunqoba uking Alfred, emzuliswaneni wesine, wazuza isicoco sasenatal esisindweni se- welter.
Impi eyalandela yaba ngomhla ka-26 kunhlangulana (June) 1956 lapho aba ngumpetha waseningizimu Afrika esisindweni se- welter, enqoba ngamaphuzu ugilbert Petros, emizuliswaneni engu-12.
Wasivikela ngempumelelo lesi sicoco kusimon “Young Batter” Mbatha ngaphambi kokunqoba u-elijah Nyakale, abe ngumpetha waseningizimu Afrika esigabeni esiphakathi ( middleweight). Ngondasa (March) 1957 wavikela isicoco se- welter
ebhekene nobilly Wilkens.
Emuva kokusivikela kathathu isicoco se- middleweight, futhi engekho owayemphonsela inselelo, walibamba ngezandla zombili ithuba lokuwela ayokulwa elondon kwelasengilandi lapho atholana phezulu nomakadebona, u-attu Clottery, waseghana.
Ukuphumelela ingcaca kukangidi kuleyo mpi ngamaphuzu emzuliswaneni eyi-10, kwenza bamgwema abanye abashayisibhakela esigabeni sewelterweight. Lokho kwabe sekumphoqa ukuba alibhekise e-australia ukuze athole izimpi.
Ngomhla ka-12 kunhlaba 1958, wehlulwa ngamaphuzu empini abayilwa ngokucishe kulingane noderby Brown phambilini, owayekade engumpetha webritish Empire esigabeni se- welter, kodwa walandelisa ngokunqoba ubilly Mcdonnell ngamaphuzu esigabeni se- middleweight.
Ngonhlolanja (February) 1959, ungidi wabhekana nojimmy Martinez wase-united States of America, wehlulwa ngamaphuzu. Empini yakhe elandelayo wanqoba ngamaphuzu umpetha webritish Empire esigabeni sewelter emuva kwemizuliswano engu-12 bengabangi sicoco.
Ungidi wanqoba izimpi ezintathu ese-australia, ayebhekene kuzo nogeorge Berry, Jack Walsh nonick Leahy wase-ire- land, kamuva owaba ngumpetha wasebritain esigabeni se- middleweight. Wabuyela kuleli ukuzovikela isicoco sakhe se- welter
kuphilemon Tshabalala lapho wehlulwa ungidi ngamaphuzu.
Ungidi wasibuyisa lesi sicoco ngokumvova inkani utshabalala ngomzuliswano weshumi futhi wavikela isicoco sakhe esigabeni se- middleweight kugabriel Seleke.
Unyaka ka-1960 wawuphetha kabi ngokuba ephucwe isicoco sakhe se- welter ngujoas “Kangaroo” Maoto, wahlulwa ngamaphuzu ngubennie Niewenhuizen empini eyabe iseMaseru kwelase Lesotho. Ngo-1961 waba nezimpi ezimbili kuphela, lapho abuyisa isicoco se- welter
empini yempindamshaye nomaoto futhi wavikela isicoco se- middleweight kutshabalala.
Ubuqhawe bakhe baba sobala ngeminyaka u-1962 no-1963 lapho anqoba izimpi ezingu-9, enye kuzona ayebhekene no-orlando Paso wasenigeria owayebatshazwa. Nakweyeshumi impi eyalandela lezi wanqoba.
Phakathi kwezimpi azilwayo, eyayibalwa nezivelele yileyo ayilwa no-enoch “Schoolboy” Nhlapho ongomunye wompetha abangasoze balitshalwa eningizimu Afrika. Wanqoba futhi nalowo phambilini owake waba ngumpetha womhlaba esigabeni se- welter, ujoe Brown.
Nokho kwavela inhlekelele ngomhla ka-8 kumandulo (September) 1965 ngenkathi ungidi ehlulwa esigabeni se- middleweight
ngurubin “Hurricane” Carter wase-united States emuva kwemizuliswano emibili kuphela.
Ustan Christodoulou owabe esemusha ngaleso sikhathi nguyena owabe engunompempe kuleyo mpi eyabe ise-orlando Stadium, esoweto. Emuva kwaleyo mpi ucarter walahlwa ngephutha ngamacala okubulala amathathu, wagwetshwa waze wadedelwa ejele emuva kweminyaka engu-20.
Ungidi wawuphetha unyaka ka-1965 ngokunqoba ezimpini azilwa no-isaac Madondo noherbert Hlubi. Ngo-1966 walwa wazinqoba zonke izimpi ezingu-7 kuzona anqoba kabili ujoe Brown. Ngo1967 wehlulwa ngamaphuzu nguEddie Perkins phambilini owayengumpetha we- junior welter ngaphansi kwe-wba.
Wavuka wazithatha ngokunqoba ugeorge Jetu, Simon Sithole, Ezra Mzinyane, nomackeed Mofokeng ngaphambi kokuphucwa isicoco saseningizimu Afrika esigabeni se- middlewight ngucarlton Monnakgotla.
Ngondasa (March) 1968 ungidi wephucwa isicoco se-welter nguMike Ramagole ngamaphuzu empini eyabe isebenoni. Wabuyisa isicoco se- middleweight ngokuvova inkani umonnakgotla emzuliswaneni wesine.
Ngonhlaba kuwo lowo nyaka ungidi wephuka umhlathi empini anqotshwa kuyona ngucurtis Cokes wase-united States of America emuva kwemizuliswano emine empini yesicoco somhlaba esigabeni se- welterweight.
Emuva kwaleyo mpi wehlulwa ngu-willie Ludick phambilini owabe engumpetha waseningizimu Afrika (kwabamhlophe) esigabeni se- welter futhi engumpetha ngalesi sikhathi esigabeni se- middleweight.
Eseneminyaka engu-35 ungidi wehlulwa nguramagole. Wehlulwa futhi ngufreddie Little empini yokungcweka, owabe engumpetha esigabeni se- light middleweight
phansi kwewba ne WBC.
Ngoncwaba 1969 wahlwithwa isicoco saseningizimu Afrika semiddleweight ngu Gordon Goba, obehashwa ngabalandeli balo mdlalo ngokuthi ngu-”black Prince”.
Emuva kokwehlulwa ngu-little, ungidi wanqoba izimpi ezine kuphela kweziyishumi nambili ngaphambi kokuba anqobe emzuliswaneni wesine ngenkathi impi eyayisethekwini mhla ka-27 kunhlaba phakathi kwakhe nophuthuma Khuboni yaqedwa ngokuba amiswe yiziphathimandla ( disqualification) ukhuboni.
Lena kwaba yimpi yokugcina Okuphawulekayo ngabadlali bakudala nabamanje wukuthi bebeqatha abakudala njengoba lokhu kufakazelwa yinani lezimpi abebezilwa ngonyaka umunye. Imithetho evikela abadlali ibingakahleleki ibe kuleli zinga ekulona namuhla.
Okubuhlungu wukuthi imali ebitholwa ngompetha bangaleso sikhathi ibincane kakhulu kunaleyo etholwa ngabashayisibhakela bakulezi zinsuku.
Nakuba singekho isiqiniseko ngalokhu kodwa ngaleso sikhathi imibiko yabezindaba yayithi ukuza kukacurtis Cokes ukuzolwa nojoe Ngidi kwakuyingqophamlando ukuba ingqwele ephethe isicoco emhlabeni ize kuleli ukuzovikela isicoco.
Sesinganezela ngokuthi ucurtis Cokes engakabuyeli emuva, walwa nowillie Ludick kwelinye izwe elingumakhelwane waleli, kwazise imithetho yangaleso sikhathi yayikuvimbela ukuba lezi zinsizwa zizwane amandla ngaphakathi eningizimu Afrika.
Ucokes wabuye waqhathwa nojoseph “Zulu Mahlabathi” Sishi wasethekwini. Nalapha futhi kusafakazela khona ukuthi bebeqatha kangakanani abashayisibhakela bakudala kunabanamuhla.
Nokho akukho lutho esizwa ukuthi luke lwenziwa yiziphathimandla, ikakhulukazi ezaseMgungundlovu lapho engowokuzalwa khona, lokuthulela isigqoko leli qhawe ukuze izizukulwane zangomuso zibe nolwazi ngalo.
Ulwazi lucobelelwe embhalweni karon Jackson: africanringmagazine.com