IMIKLOMELO YEZIMOTO IZOSHUBISA UMBANGO KWI-HEROES MARATHON

UZIMISELE ngokuvikela isicoco sakhe seheroes Marathon unkosikhona Mhlakwana ( osesithombeni) wakwazulu-natal kulo mjaho ozokuba ngesonto elizayo lomhla ka-16 kwephezulu usukela emzini kamengameli wokuqala wentando yeningi waseningizimu Afrika, unelson Mandela, osequnu, e-eastern Cape.

Umhlakwana osubathela iboxer Athletics Club, utshele leli phephandaba ngolwesihlanu ukuthi umjaho wanonyaka uzokuba nzima kakhulu njengoba izingqwele zizohlomula ngonyanyavu lwezimoto kubo bobubili ubulili.

Lo mjaho uzokube uhambisana ne-21km, i-10km ne-5km fun run.

“Ngijabule kakhulu ngokwenyuswa kwemiklomelo yalo mjaho. Ukufakwa kwemiklomelo yezimoto kwizingqwele kuzokwenza ukuba lo mjaho ube sezingeni eliphezulu kakhulu kwazise bazokube bebaningi abantu abazolwela umklomelo wemoto.

"Ukunqoba kwami lo mjaho nyakenye kunginike okukhulu ukuzethemba. Kangingabazi ukuthi ngizokwazi ukusivikela isicoco.

"Ngifuna ukuhamba ezinyathelweni zomqeqeshi wami uprodigal Khumalo ohlomule ngemoto kwiZululand District Marathon (ZDM) ekuqaleni konyaka olundi,” kusho umhlakwana ozuze u-r50 000 enqoba iheroes nyakenye.

Umhlakwana wenze kahle emijahweni eminingi nonyaka kanti uthi ubehlose ngayo ukuzicijela iheroes Marathon ukuze afike kuyona eqatha. Ekuqaleni konyaka udle ubhedu kwideloitte Marathon eqale eballito yasongwa ekings Park Athletics Stadium. Ngomfumfu (October) ungene isibili kwi-or Tambo Marathon kanti ikhona neminye imijaho ayinqobile nonyaka.

Ingqwele kwabesifazane nyakenye kwaba ngu-asefa Chelitu wase-ethiopia okulindeleke ukuba naye abe yingxenye yawo.

Umengameli we-athletics Transkei (AT), ulungisile Molwana, uthe sebemi ngomumo ukusingatha lo mjaho wokuhlonipha umandela.

Uthe njengoba nonyaka iningizimu Afrika igubha iminyaka eyikhulu umandela azalwa, nabo banqume ukuklomelisa abasubathi ngendlela abangasoze bayikhohlwa.