Kuvela okuxoshise utinkler kwichippa
Ingxabano nomayambela ingenwe ngabanye abadlali
KUVELA okuxoshise u-eric Tinkler ( osesithombeni) esigqikini sokuqeqesha ichippa United evale lesi sikhala ngokuqasha ujoel Masutha osanda kuchithwa yiblack Leopards notshepo Motsoeneng obecija onozinti kwitornado FC yase-eastern Cape.
ILANGA Langesonto lihoshe ngemithombo yalo engashayi eceleni ukuthi ukuxabana kukaTinkler nomark “Professor” Mayambela yikhona okumdalele amazinyo abushelelezi kubadlali.
Kuthiwa bese kucacele ngisho ingane ukuthi utinkler ngeke esakwazi ukuqeda isizini nale kilabhu kwazise abadlali bebegodle amandla.
“Bese kunzima kutinkler, ubengeke akwazi ukusinda kulobu bunzima kwazise umdlali onjengomayambela uyezwana nosiviwe Mpengesi ongumnikazi wekilabhu. Ngaphandle kwalokho, ukuxabana nalo mdlali kakwehlanga kahle kwabanye abadlali bale kilabhu asebefana namadlozi ayo,” kusho umthombo.
Utinkler ethintwa yileli phephandaba ngolwesihlanu, akafunanga ukungena odabeni lokuhamba kwakhe kule kilabhu ezeseka ngokuthi usapholisa ikhanda.
Uthe uxoshwe engazelele. Uthe akakazimiseli ngokuphawula ngokuhamba kwakhe okwamanje kumbe ukuxoxa nabezindaba.
“Kangikazimiseli ngokunaba ngokuhamba kwami kwabezindaba. Ngicela ukunikwa ithuba lokuzihlalela nomndeni wami ukuphumuza umqondo. Okwamanje kayikho ikilabhu esike yangithinta ngomsebenzi. Ngizolinda kuze kube wunyaka ozayo bese ngibheka indlela eya phambili,” kusho utinkler.
Umpengesi ubuye wabuyisa usinesipho Mali obekuvele ukuthi wakhonjwa indlela. Umali ubenza umsebenzi wokucubungula imidlalo yezitha. Esinye isikhulu sechippa, upeter Koutroulis, kuvele ukuthi sifakwe amasondo kule kilabhu kanti phambilini uwanda Mbenguzana obeyimenenja ushiye phansi ukusebenza kule kilabhu.
Imizamo yokuthola ulukanyo Mzizi oyisikhulu esiphezulu kwiChippa, iphunzile kwazise ucingo lwakhe belukhala kodwa lungabanjwa.