Ziyaqina ezokuza kwe-afcon kuleli
Kudingeka u-r140 million ukusingatha le midlalo
ZIYA ngokuqina izinsolo zokuthi iningizimu Afrika kungase kube yiyona egixabezwa ngelungelo lokusingatha i-africa Cup of Nations (Afcon) okuhlelwe ukuba igijinywe maphakathi nonyaka ozayo.
Inhlangano eyengamele ibhola e-afrika, iconfederation of African Football (CAF), imemezele ngeledlule ukuthi iyayephuca icameroon ilungelo lokusingatha imidlalo ye-afcon ngenxa yokuthi isalele emuva ngomsebenzi.
Kuvela ukuthi izinkundla okufanele zisetshenziswe zisemuva kakhulu, kuzoshaya isikhathi semidlalo zingakalungi.
Ngaphandle kwalokho, kuvela ukuthi kunezimpi zombusazwe ezingase ziphazamise le midlalo.
Nokho icameroon iyakhala ngalesi sinqumo njengoba ikholwa wukuthi bekuzofika imidlalo zonke izinto zisesimweni.
Nakuba isiphuciwe le midlalo kodwa ithembisa ukuqhubeka nokwakha izinkundla ngenhloso yokutshengisa icaf ukuthi yenze iphutha ngokuyephuca le midlalo.
Icaf ibe isicela iningizimu Africa nemorocco ukuba kube yibona abafaka izicelo zokusi- ngatha le midlalo. Womabili la mazwe asamukele lesi sicelo futhi athembisa ukuthi azolungisa imiqulu okuyiyona ezochazela ngayo icaf ukuthi kungani kufanele kunikwe wona le midlalo.
Ngolwesine kufanele la mazwe ayoma phambi kwecaf ayibekele ukuthi kungani kufanele kunikwe elilodwa lawo le midlalo. Kulindeleke ukuba ngomhla ka-26 uma sekuhlangene isigungu secaf, kumenyezelwe ngokusemthethweni ukuthi ngubani ozonikwa le midlalo ngokugcwele.
Leli phephandaba lithole ukuthi iningizimu Afrika yiyona esethubeni lokunikwa le midlalo kwazise iyishiya ngamalengiso imorocco ngengqalasizinda.
Kuvela ukuthi izinkundla zasemorocco zindala futhi ziye- thusa uma sezigcwele kanti ezakuleli zisesimweni, kungadlalwa noma yinini kuzona yinqobo nje uma kukhona imali.
Kuthiwa nangaphandle kwalokho ezokuthutha emorocco ziyinkinga, kungenwa kuphunywe kanzima ezinkundleni zakhona kanti kwezakuleli konke kuhamba kahle. Nokho kuthiwa into engase imise kabi elakuleli yimali njengoba isafa ingenamali, isazoncenga kuhulumeni wakuleli.
Kudingeka u-r140 million ukuze kusingathwe le midlalo ngokweqophelo eliphezulu.
Leli phephandaba lishayela udominic Chimhavi wezokuxhumana kwisafa, uthe konke kuzoncika ekutheni uhulumeni wakuleli uthini.
“Siyisafa sisamukele isicelo secaf sokuba sisingathe le midlalo. Kumanje simatasa silungisa umqulu esizowethula ngoLwesine kwicaf. Kodwa-ke ngeke sikufihle ukuthi siyisafa kasinayo imali yokusingatha le midlalo, sisazoshaya indesheni kuhulumeni wakuleli ukuba ufake isandla. Konke kulele kuwona kodwa ngokwethu nangokocwaningo esesilwenzile sinethuba elikhulu kunemorocco lokunikwa le midlalo ngaphandle-ke uma singashaywa ngepolitiki,” kusho uchimhavi.