UDUNWE IMOTO UTHAH SIMELANE
UDUNWE imoto sekusele kancane afike kubo unontandakubukwa wetheku, unkululeko Tha Simelane ( osesithombeni), ngolwesine kusihlwa.
Utha uhlangabezane nalo mshophi elokishini akhulele kulona, Kwamashu, ngesikhathi ephuma emcimbini wokwethula ngokusemthethweni kwehazelmere Jazz Festival obusezindlini zokusakaza zegagasi FM, enxanxatheleni yezitolo icornubia.
Echaza ngokumehlele utha, uthi kuqhamuke imoto yamvimba ngaphambili ngesikhathi eme ezimpambanweni zomgwaqo kulona leli lokishi. Uthi uqale wacabanga ukuthi ngabantu abamjwayele bayamdlalisa ngaphambi kokuba kuphume owesilisa obephethe isibhamu, wamkhomba ngaso.
“Ngiphume ngabaleka ngoba bese ngibona ukuthi abezile ngokudlala, ngibanjwa inkunzi,” kusho utha obekuzwakala ukuthi usaphatheke kabi ngalesi sigameko futhi simshiye eshaqekile.
Uthi izigilamkhuba zithathe imoto nezimpahla zakhe ebezisemotweni okubalwa namakhadi akhe asebhange nomakhalekhukhwini.
Uthi ulivulile icala esiteshini samaphoyisa akwamashu.
Okhulumela amaphoyisa akwazulu-natal, ult-col Thulani Zwane, ukuqinisekisile ukuthi likhona icala elivuliwe lokuduna imoto nokubamba inkunzi esigamekweni esenzeke Kwamashu kanti bekungakaboshwa muntu.
Utha uzakhele udumo ngokuba wumphathi wohlelo emicimbini emikhulu eyahlukene Kwazulu-natal, kanti useke wabonakala nasemafilimini avamisa ukukhonjiswa esiteshini esizimele, umzansi Magic, kuchannel 161.
Uzobe engomunye wabaphathi bohlelo kulo mcimbi ozoba sehazelmere mhlaka-26 kule nyanga.