SEYIPHINDE YAMISWA EYE-PSL KUMA-RADIO
I-ORLANDO Pirates iqede umdlalo ingasaphelele ihlulwa yibaroka FC ngo-3-2 wamaphenathi kowamanqamu wetelkom Knockout izolo ebusuku enelson Mandela Bay Stadium, ebhayi. Lo mdlalo uphele ngo-2-2 emuva kwe-extra time kanti esikhathini esijwayelekile kube ngu-1-1.
Ipirates iqede lo mdlalo ingasaphelele kukhishwa ngekhadi elibomvu unyasha Munetsi odlalise kabi ugoodman Mosele ngomzuzu ka-40 kungenasidingo njengoba ebengasemugqeni wesenta futhi engaqondene namapali.
Kulo mdlalo usiyabonga Mpontshane uqhubekile nokuba yikhongco elibuthaka kwibucs enika isipho sikakhisimusi ibaroka ngesikhathi ephumela ibhola elikude naye, ahluleke wancama ukulithinta, labuyiselwa ebhokisini okwenze ujemondre Dickens walibhakuzisa kalula enethini ngomzuzu ka-45.
Leli phutha likampontshane lithi malifane nalenze ibucs ihlula ikaizer Chiefs ngo-2-1 koweligi ngasekuqaleni kwenyanga edlule. Kulowaya mdlalo umpontshane wapha ukhama Billiat igoli elilula. Lo nozinti ubuye wadala iphenathi kwi-extra time ebhakuziswe ezintanjeni ngumduduzi Mdatshane ngomzuzu ka-100.
Igoli lebucs kulo mdlalo lize nomusa Nyatama emuva kokuba unozinti webaroka, u-elvis Chipezeze, ehlulekile ukubamba ngqi i-free kick ebithunyelwe nguJustin Shonga ngomzuzu ka-56. Ngesikhathi abaningi sebecabanga ukuthi ibaroka iyanqoba, uthembinkosi Lorch ungqofele enethini ibhola ebeligotshwe ngushonga ngomzuzu ka-115 okwenze lo mdlalo wagcina usuxazululwa ngamaphenathi.
Lo mdlalo usakazwe ngesivumelwano semizuzu yokugcina kumaradio akwasabc.