Ukuzithanda nokuzinakekela ngokwawo wonke umuntu
Uthi ngesikhathi esakhula bekuthi ontanga uma bematasa bekhenikha izimoto, yena ubedabula amabhulukwe akhe awenze ngendlela ezomenelisa kangangoba wayehlale exabana nonina, emthethisela ukuthi umosha izingubo.
“Bengikhonze nokubuka izinhlelo zetv ezigxile kwimfashini. Ngesikhathi ngiphothula u- matric bese ngicacelwe bha ukuthi ngifuna ukwenzani, kodwa ngaleso sikhathi lo mkhakha ububukeleka phansi, kwaziwa ukuthi uma ungumthungi uthunga amaphinifa,” kuchaza yena.
Ngenxa yempokophelo nothando lwalo mkhakha, ufunde ngasese elinea Academy of Fashion lapho azidlela khona amahlanga ezifundweni, wathola nethuba lokusebenza nezinkampani ezinkulu kulo mkhakha okubalwa kuzona ihilton Weiner, lapho ayesebenza njenge- stylist ngaphambi kokuba yi- visual merchandiser.
Kungakapheli nesikhathi esingakanani usebenze njengebrand manager esitolo esikhiqiza amasudi asemgangathweni, ic Squared, asincoma kakhulu ngokutshala kuyena imbewu yothando lwamasudi.
USEGQOKISA NOSAZIWAYO
“Ngiqale ukugqoka amasudi agqamile engakabi sesitayeleni, ngaba ngowokuqala ethekwini ukuba nawo ngaphambi kokuba asabalale abe yitrend.
“Lokhu kungivulele amathuba okugqokisa osaziwayo okubalwa kubo abadlali berugby usbura Sithole no-odwa, umculi uzakes Bantwini nabanye,” kusho yena. Ugqugquzele nabanye ikakhulukazi abesilisa ukuba bazithande futhi bayinake indlela abagqoka ngayo. Uthi ukuzithanda akungalindeleki kwabesifazane kuphela, kodwa akube yinto yawo wonke umuntu.
Uma echaza ngesitayela sakhe uthi uhlale e" suited up.” “Angikwenqeni ukuba formal kangangokuba uthayi ngiwukhumula sengilala. Uma ngiziphumulele ngigqoka izikhindi nama- golf shirt ngiwashutheke ngaphakathi nophaca begama,” kusho upercy. Ngokomsebenzi wakhe kwidurban Fashion Fair, uthi kuningi azigqaja ngakho akufezile kulo nyaka.
UCIJA ABASIKI BENGQEPHU BASEMALOKISHINI
Upercy ucija abasiki bengqephu basemalokishini ngolwazi lwezemfashini nokusabalala kwalo mkhakha. Uma ekhuluma ngamaphupho akhe ka-2019, akubeke eqhulwini ngukwethula ilebuli imarc Percy, ezogxila kakhulu ezimpahleni zokugqoka zabesifazane. “Nginesifiso sokuba yethulwe ngokusemthethweni phakathi nonyaka,” ephetha.
INDLELA AZINAKEKELA NGAYO
Ngiyakuthanda ukunuka kamnandi. Kumele kuzwakale ngephunga ukuthi sekungene umuntu wesilisa ozaziyo ukuthi ungubani. Iphunga linendima enkulu eliyidlalayo endleleni owamukeleka ngayo.
Ngihlala ngigundile ekhanda ukuze kuheleze umoya. Ikhanda eligundiwe likwenza ubukeke uyinono.
Abangaziyo bayazi ukuthi ungangithinta noma yikuphi lapho othanda khona, kodwa hhayi ubuso bami. Okwamanje abukho bushelelezi ngale ndlela engiyifisayo.
OKUKWI-MAN BAG YAKHE
"Angihlukani nepeni, i-ipad ne- diary.
"Okunye ozokuthola uma uvula isikhwama sami yi- cologne njengoba bengishilo ukuthi ngiya- kuthanda ukunuka kamnandi.
"Ngihlale ngiphethe amawashi amabili esikhwameni sami ukuze uma kwenzeka lifa elinye ngisebenzise elinye.
Iwashi kimina alisiyona i- accessory nje, kodwa liyingxenye yokubukeka kwami.
Ngeke ungibone ngihlobe ngewashi elingasebenzi, yingakho kuhlale kunelicuphile ngoba ngiyawathanda kakhulu. ayandab@ilanganews.co.za