UMLANDO UZOTHINI NGO-2018?
KUNESISHO sesizulu esithi kalishoni lingenazindaba zalo, kanjalo nonyaka kawupheli ungenazo izigameko zawo. Kuningi okwenzekile ku-2018, okuhle nokubi kepha okubalulekile njengoba sesiwuphetha lo nyaka, wukubheka unyaka esiya kuwo okungu-2019 ukuthi usiphatheleni.
Uma uphela unyaka kubalulekile ukubuyekeza ukuthi uqhuzuke kuphi bese ubheka ukuthi ungawalungisa kanjani amaphutha nokuthi uzigwema kanjani izikhisi ophonseke kuzo.
Kusemqoka ukuzibongela, ujabulele lokho okuzuzile, noma ngabe kuncane noma kukhulu.
Njengoba kuphela unyaka, kubalulekile ukuba siphume sifumbethe izifundo ezithile esizithole ku-2018, ezizosisiza ekubhekaneni no-2019.
Ngokujwayelekile uma kuqala unyaka siye sizibekele imigomo ethile esisuke sifuna ukugxila kuyo onyakeni omusha. Ikakhulukazi leyo migomo kusuke kungethinta ukuphucula isimo sempilo ngezindlela ezahlukene. Okusemqoka uma sizimisele ngokugxila singagudluki emigomeni esizibekele yona ukuba sizinikele zisuka amagqozo, unyaka usaqala.
Uma sizibekela imigomo ngezinto esifuna ukuzenza kumele sikugweme ukuthatha izinto ezishiwo ngabanye abantu bese silandela zona, kodwa masizibekele imigomo esiyibona ibalulekile kithi futhi engeke ibe ngaphezu kwamandla ethu.
Kusemqoka futhi ukuba sibe nohlelo oluqondile lwezinto esizimisele ukuzenza onyakeni omusha, njengokuthi nje uma uhlose ukwehlisa isisindo somzimba, yazi ukuthi ufuna sehle kangakanani futhi ngasiphi isikhathi.
Okunye esiye sikufise wukuphila kangcono, sehlise izikweletu. Okubalulekile uma uzibekele umgomo wokunciphisa izikweletu wukuba uqale zisuka phansi ufunde ukonga nokusebenzisa imali ngendlela efanele. Masizifundise ukuba nohlelo lokusebenzisa imali ( budget).
Nangawo u-2019 khumbula ukuthi uma kufika izikhathi lapho uqhuzuka khona, ungadikibali ukuvuka uzithintithe, uqhubekele phambili. MHLELI, usuya kobabamkhulu u-2018 - umlando uyothini ngalo nyaka obuqeda iminyaka eyikhulu kwazalwa umnu Nelson Mandela nomunye womama besizwe, unkk Albertina Sisulu. Baningi phela onozala bale nkululeko esiyichela ngomshobingo, siyishaye ngamadede.
Kwahamba omunye womama unkk Winnie Madikizela Mandela owajoyina abanye omama Besizwe onkk Charlotte Maxeke, Lillian Ngoyi, Florence Mkhize, Victoria Mxenge, Jabu Nzima, Lindiwe Phahle, Ray Alexander Simons, Fatima Meer, Gladys Manzi, Tryphina Njokweni (Imbuxela), Ruth First, Dulcie September nabanye.
Ngaphakathi nangaphandle kweANC besilwa nabaphangi besikoqokoqo sesizwe, sashiwa ngamaqhawe omnu Ahmed Kathrada, Zola Skweyiya, Laloo Chiba, George Nene, Eddie Fundi, Billy Modise nomendi Msimang.
Ukhongolose useyintandane yingakho sekunezingane ezithi “sesifikile isikhathi sethu, yithi esesiya ephalamende, zikopela KU-EFF ebunjwe yizingane zijahe amathenda. Uma sifihla lawa maqhawe ulusha lwe-anc alubikhona kodwa komax, eyadini nakuFlorida Road lugcwala khona. Yidlanzana elethamele inkonzo yesikhumbuzo kamnu Cletus Mzimela.
Unxamalala, ugehazi wakuleli ngeke awulibalele lo nyaka. Kusukela ngo-2008, ibiqala ngqa I-ANC ukwenza into ebhadlile, yamsusa. Lo baba usihlukumezile isikoqokoqo sesizwe, akanawo nakancane amahloni.
Kufanele izimeya ezinjengonkk Zandile Gumede noricardo Mthembu nomnu Sihle Zikalala (ungqongqoshe wezokuthuthukiswa komnotho, ezokuVakasha nezemvelo Kwazulu-natal) bafunde esenzweni sokwesula esikhundleni kukamnu Malusi Gigaba, Nhlanhla Nene, nabaphangi BEVBS.
Uzembe, ngisho umnu Cyril Ramaphosa, usenza kahle noma kusafanele avakashele abafelokazi nezintandane zasemarikana futhi aphumele obala ngebosasa nendaba ka-r500 000 ukuthi wawuthatha kwenzenjani.
Umklomelo kamampara ka-2018 uzuzwe yilaba: Gehazi Zuma, Malusi Gigaba, Qedani Mahlangu, Nhlanhla Nene namaqola EVBS.
Izandla zethu zidlula ikhanda, sibonga bonke ababe nomthelela ekubeni agcine unxamala ephumile. Izinkantolo nekhomishana kajaji Zondo zizosivezela ukuthi ungubani futhi ungumuntu onjani unxamalala. Kuyadina ukuthi asiyigubhanga iminyaka engama-30 sashiywa yiqhawe lomkhonto Wesizwe uthami Zulu, elangempela uboniface Muziwakhe Ngwenya - le nsizwa iyakhuluma manje ngaphansi komhlaba.
Ngo-2019 asiqhubeke nokududula igciwane lokweba kodwa-ke ezikagehazi nobarabbas nosaul zizolwa. Akufanele sibe nomholi ozongcolisa amagama nemizabalazo yenkosi umaqoma, eminyakeni engama-140 wazama ukweqa erobben Island neNkosi ucetshwayo eyayivikela umhlaba wethu empini yasesandlwana. Umkhonto Wesizwe waqamba elinye ibutho ngalesi Silo. Leli butho lalinamaqhawe anjengotheophillus Dlodlo nojohannes Pass Four Phungula. Ngo-2019 asiwakhumbule amaqhawe anjengalawa makhosi umaqoma nocetshwayo. Kanti izincomo zekhomishane kamoerane zizokwenziwa nini?
Ake kuqale u-2019 sixoxe ngokuthi sifuna abaholi abanjani, sizibuze ukuthi akufanele yini manje ukuba umengameli, ondunankulu nezimeya bakhethwe yithi ngqo. Ngicabanga umnu DD Mabuza engumengameli - kungamane kube ngubalingisi bemidlalo kamabonakude upatronella wethe Queen noma ujola kandlovu wesibaya.
Noma ngabe yimuphi umholi wanoma yiliphi iqembu lezombusazwe, ake siqoqe ulimi uma sikhuluma, kungabi sengathi umholi udilika emthini womkhuhlu. Angisho wena Mama Khawula WE-EFF, ungunomahlaya. Nokhongolose ake ungamfaki unxamalala uma ukhankasa, akaqale asuse iququ elimlandelayo, liyavimbanisa bo!
Ngo-2019, unyaka wesilo ucetshwayo, ake senze izinto ezinhle thina esikwipolitiki nakuhulumeni. KUNEVBS enkulu kwithala Bank nakumkhandlu wetheku lapho kuxoshwe abasebenzi behhovisi likamphenyi-mabhuku ezimali.
Siyanda Mhlongo KWADUKUZA