UMKHOMBANDLELA
KWELANAMUHLA sizoxoxa kafushane ngobungozi benyama ebomvu, ikakhulukazi umthelela wayo ekudaleni isifo senhliziyo. Lesi sikhathi samaholide okuphela konyaka saziwa ngolukakhwini ngokuthi yi- festive season, okungukuthi yisikhathi lapho iningi lethu lizitika ngezidlo neziphuzo, yebo nalo ngqo uphuzo olunamandla.
Yiqiniso elibuhlungu leli lokuthi iningi lezifo zanamuhla umsuka walo usekudleni okudliwayo kulesi sizukulwane. Izindlela zesimanje zokukhiqiza ukudla emasimini zinomthelela omkhulu okungaze kungaxoxwa ngawo ngoba imiphumela ibonakala emuva kwesikhathi eside.
Phakathi kwezinto ezibalwayo kulokhu wumthelela wezibulala-nambuzane, yizivimbela-kubola ( preservatives) nezitshalo eziguqulwe ulibofuzo, phecelezi genetically modified foods (GMOS). Umthelela wezibulalanambuzane nezivimbela-kubola, kafuphi kuchazwa ngokuthi kudala ukungcola okunobuthi, phecelezi toxicity nokulapho kuxhantela khona zonke-ke ezinye izinkinga eziyimbangela yobuthaka bempilo yomu-ntu.
Nokho-ke okwamanje akukaqondakali ngokuphelele ukuthi esimeni sempilo jikelele yomuntu osebenzisa ukudla osekuguqulwe ulibofuzo ngale ndlela, uba yini umphumela walokho. Ngake ngezwa esinye isihlobo sami esiqeqeshiwe emkhakheni wobuchwepheshe bokukhiqiza izitshalo ngezindlela zesimanje (food technology) sithi ngenxa yokukhula kwesibalo sabantu, okuphokophelwe yiziphathimandla wukuqinisekisa ukuthi ukudla kuyatholakala ezweni ngaso sonke isikhathi ( food security). bonhlobo zokudla phakathi kwazo okubalwa imifino (ama- vegetable), yizithelo, okusanhlamvu nezitshalo eziwu-mthombo wesakhamzimba i- protein ezinye zazo okuwuphizi ( peas) nobhontshisi. Nakuba amakloza edaza inkani namanje, okungasiza umfundi lapha wukukhumbula isisho sesizulu esithi ‘kusinda ezakwaluvadlwana’. Ukuzithiba enjabulweni engeyesikhashana kungcono kunokudala umonakalo waphakade emzimbeni. Abanye bazivikela ngokuthi vele umuntu ugcina edlulile emhlabeni ngisho eyekile ukudla izinto osekubikiwe ukuthi ziyingozi empilweni njengayo inyama ebomvu neziphuzo ezihlwahlwazayo ezinoshukela.
Kodwa iphuzu elibacashele yilelo elithi labo abaxwayisa ngobungozi balezi zinto basuke bengasho ukuthi oziyekayo uphila ingunaphakade, abasuke bekugcizelela wukuthi ngenkathi umdali esakubusisile ngokuphila emhlabeni, yiba wumqemane.
Akekho ongase akuphike ukuthi ukuhlala uzizwa uphile kahle sonke isikhathi kuyiphupho likanoma wubani. Yiqiniso elicacile leli kuhle kwekati elimhlophe ehlungwini.