Ufisa ukuba ngumlimi unkonde
UKUQALE engakuthandi ukugijima usiyabonga Nkonde, osubathela i-ethekwini Athletics Club, oseke wamela ikwazuluNatal neningizimu Afrika amahlandla amaningi emiqhudelwaneni ehlonishwayo emhlabeni.
Unkonde kuthiwa ulandela uwillie Mtolo ngokuhlonishwa kwezokugijima Kwazulu-natal ngenxa yekhono lakhe kulo mdlalo.
Lo msubathi ongomunye wabenza kahle esifundazweni, uzalwe ngomhla ka-13 kuntulikazi (July) ngo-1988 emadadeni, enewcastle.
Uzalwa ngujabulile Dlamini noAlfred Nkonde ongasekho emhlabeni.
Bane kubo nguthokozani, uzweli nodadewabo wakhe uthobile naye osadlula emhlabeni bese kuba nguyena.
Uqale imfundo yamabanga aphansi esinqobile Primary wadlulela esekusile High School, lapho ephothule khona ugrade 12 ngo-2006. Udlulele edurban University of Technology (DUT) enza izifundo zesport Management ekhokhelwa yikwazulu-natal Athletics (KZNA) isaphethwe nguAleck Skhosana.
Kube wukushintshwa kobuholi kule nhlangano waphoqeleka ukuyeka isikole kwazise ubengasakhokhelwa.
Uthi umdlalo wokugijima ubengawuthandi, ungene kuwona ezenzela amabanga aphansi.
Uthi ufike sekudlule isikhathi ekilasini, uthisha obemfundisa wathi makangene eqenjini lezokugijima ngenhloso yokumjezisa.
Ungenile eqenjini labagijimi yize ebengazi lutho ngakho.
Eqala ukugijima, ubenza u-1500m lapho enqobe kwaze kwaba kathathu wabe eseqokelwa ukuyomela isifundazwe.
Umjaho wakhe omkhulu wokuqala ubusekings Park Athletics Stadium lapho engene khona endaweni yesine.
Uthi ubeqala ukushiywa empilweni yakhe.
Ngenxa yekhono lakhe kulo mdlalo, ube eseshelwa nguvusi Madlala obefundisa futhi eqeqesha esekusile High School, emadadeni.
Uthi ngemuva kwalokho ithalente lakhe lokugijima ligqame kakhulu njengoba ekwazile ukuhlomulela isifundazwe izindondo eziningi esafunda isikole.
Lo msubathi uke wamela iningizimu Afrika kwi-international Association of Athletics Federation (IAAF) Cross Country ejapan nasepoland ngo-2006 nango-2010 ngokwehlukana. Ngo2007 ubekwicaa Southern Region Track & Field eburkina Faso nase-ethiopia (2008) nakweminye imidlalo eminingi, ehambela amazwe ehlukene.
Unesikhathi esingu-8:19 kwiYouth, no-8:04 kwisigaba samajuniya ngokwehlukana ku-3000m, no-28:40 kwi-10 000m okungamarekhodi esifundazwe angakephulwa. Ingxoxo kankonde NELANGA
Langesonto ngempilo yakhe yaNgaphandle kwenkundla ihambe kanje:
ILANGA Langesonto ( I/ L):
Ungumuntu onjani?
Nkonde: Ngiwumuntu othanda ukufunda nokuhlala nginolwazi ngento engiyenzayo. Kangilona uhlobo lomuntu olufela ngaphakathi, uma into ngingayithandi kangithuli. Ngiyazimisela entweni engiyenzayo.
I/ L: Uyenzile imikhuba yabafana usakhula?
Nkonde: Ngiyenzile yonke.
Ngikhulele emaplazini. Ngelusile, ngaqhathwa, ngabhukuda. Ukukhulela emakhaya nezinselelo zakhona ngicabanga ukuthi kungisize kakhulu. I/ L: Uyakholwa?
Nkonde: Kanginaso isikhathi sokuya esontweni ngenxa yokuthi umdlalo wami uba ngamasonto. Ngiyakholelwa kodwa ezintweni zesintu.
I/ L: Usichitha kanjani isikhathi sakho?
Nkonde: Ngisichitha nomndeni wami, ngizihlalele nezingane zikadadewethu osashona. I/ L: Usushadelwe?
Nkonde: Yebo. Ngishade noMpumelelo Mbatha. Nginengane eyodwa yomfana usamkelo (7) okungeyona eyasemshadweni.
I/ L: Yini eyokuqala oyenzayo uma uvuka ekuseni?
Nkonde: Ngithatha amateki ami ngiyogijima.
I/ L: Ukhona omunye umdlalo owuthandayo?
Nkonde: Ngithanda ibhola lezi
nyawo.
I/ L: Yiyiphi ikilabhu oyilandelayo kuleli naphesheya kwezilwandle? Nkonde: Ngithanda ikaizer Chiefs kanti phesheya kwezilwandle ngilandela imanchester United.
I/ L: Ubani umdlali omthandayo noma obukela kuyena?
Nkonde: Ngithanda u-eliud Kipchoge wasekenya ophethe irekhodi lomhlaba lemarathon u-2:01:39. Engikuthandayo ngaye wukuthi unobuntu, akazithwele. Ngike ngahlangana naye ngisekenya kulula ukukhuluma naye kanti uyasiza ngolwazi. I/ L: Yiliphi izwe olithandayo?
Nkonde: Yikenya. Abantu bakhona banobuntu. Ngike ngaya e-united States of America, abantu bakhona abanendaba nomunye umuntu, kucishe kufane nasegoli. I/ L: Uthanda nhloboni yemoto?
Nkonde: Ngithanda izimoto zakwa-audi kodwa okwamanje ngifuna imoto ezongithatha ingiyise lapho ngifuna ukuya khona ikwazi ukungibuyisa.
I/ L: Emidlalweni yakuleli ewuchungechunge yimuphi owulandelayo? Nkonde: Angiyikhonzile kakhulu. Ngibuka izindaba.
Ngenxa yendodana yami ngigcina sengibuka uzalo neskeem Saam ngoba izikhonzile lezi zinhlelo.
I/ L: Ulalela hlobo luni lomculo?
Nkonde: Ngithanda umculo onomyalezo. Abaculi engibathandayo u-2pac, umandoza nolucky Dube.
Nginawo wonke amacd kadube ngenxa yomyalezo osemculweni wakhe.
I/ L: Ukhona ezinkundleni zokuxhumana?
Nkonde: Yebo ngikwifacebook nakwiwhatsapp. Ngiwusiyabonga Nkonde kanti ngiphatha ifoni yakwasamsung.
I/ L: Yini osuke wayizuza ngokugijima?
Nkonde: Kuningi yize imali incane. Ngishadelwe ngakhela umama indlu ngafaka nefenisha. Ngiqale ukuba wusizo ekhaya ngisafunda ugrade 11 ngemali yokugijima.
I/ L: Ugcine nini ukukhala? Nkonde: Ngikhalile nyakenye ngesikhathi ngishadelwa. Ngiphinde ngakhala ngenyanga edlule ngesikhathi kudlula ugogo wami emhlabeni.
I/ L: Uzibona ulaphi eminyakeni eyisihlanu kusuka manje? Nkonde: Ngifisa ukuba ngusomabhizinisi. Senginayo indawo kanti inkosikazi yami yenza izifundo zeprimary Agriculture. Ngizosebenzisa nolwazi lwami lwasemapulazini. Ngizimisele ngokusungula isikhungo sami sezemidlalo.
I/ L: Yini ekwenza uzigcine uvelele kwezokugijima? Nkonde: Kubalulekile uma ufuna ukuvelela kulo mdlalo uqale ezimpandeni zawo. Ngeke uphumelele ekugijimeni uma ungabazi ubuhlungu becross Country netrack & Field. Uma uqale lapho uzokuya kude. Abagijimi abaningi abavelele emhlabeni baqale khona.