Lizulelwa amanqe ikusasa likagc kuzalo
Kuthiwa kunezihibe ngesivumelwano senkontileka entsha
KUSUKE inxushunxushu ngenkontileka yesilomo esingumlingisi womdlalo owuchungechunge, Uzalo. ILANGA Langesonto lihabule emithonjeni yalo ehlukene ukuthi izingxoxo ezimayelana nokuvuselelwa kwenkotileka yesizini entsha kakhaya Dladla, odume ngelikagc kulo mdlalo, zi- finyelele kwangqingetshe. Eminye imithombo ithi lezi zinkinga eziqubukile zingase zibeke ikusasa lalo mlingisi engcupheni yokuba kuphele ngaye kulo mdlalo, angabuyi kwisizini elandelayo.
Umthombo wokuqala opotshoze lolu daba uthe UGC ufune okungaphezulu kwalokho abekubekelwa etafuleni ngabakhiqizi balo mdlalo. Lo mthombo uthe ngokwazi kwawo kugcine kungavunyelwananga, okungaholela ekubeni uma kungekho owehlela ngezansi, angabe esabuyela UGC kwisizini elandelayo, okulindeleke ukuba iqale ngoMashi wonyaka ozayo. Omunye umthombo waleli phephandaba othintiwe ngemuva kokuputshuka kwalolu daba uveze ukuthi nakuba ungenaso isiqiniseko ngezingxoxo zikaGC nabakhiqizi bomdlalo mayelana nenkontileka yakhe kodwa uyazi ukuthi izinkinga ZE-SABC zibe nawo umthelela ekubeni abanye babalingisi bangagculiseki ngezinkontileka zabo ezintsha.
“Engikwaziyo wukuthi kunabalingisi ababethenjiswe okuthe xaxa uma zivuselelwa izinkontileka zabo kodwa ngenxa yenkinga yemali KWASABC lokhu kwase kushintsha, kwangabe kusahamba ngamagama enkehli,” kusho umthombo wesibili.
Omunye wabalingisi okhulume naleli phephandaba, ocele igama lakhe lingadalulwa, uthe useke wasibona i- script sesizini elandelayo samasonto amabili - UGC akabonwa nangalukhalo kusona, okungenzeka ukuthi sekuphelile ngaye noma usencishiselwe isikhathi azosilingisa.
“Ngeke ngisho ukuthi usekhona noma akasekho kodwa angikamboni kwiscript sesizini yesihlanu,” kusho lo mlingisi osidonse ngendlebe ukuthi singalidaluli igama lakhe ngenxa yokuthi angangena kolukhulu ubishi. Ethintwa yileli phephandaba UGC uvumile ukuthi kuke kwakhona abebengavumelani ngakho kodwa bagcine sebevumelene. “Yinto ejwayelekile ukuba kube nezingxoxo, kuhlalwe phansi kuboniswane, nami ngisho olwami uhlangothi ngezidingo zami. "Ekugcineni kusuke kungaxatshanwa kodwa kuyilungelo lazo zonke izinhlangothi ukuba zibonisane ukuze zigcine zivumelana ngezinto ezizozigculisa,” kusho lo mlingisi eqinisekisa ukuthi usazoba yingxenye yalo mdlalo. U-ayanda Mthiyane okhulumela Uzalo ucele ukuthunyelelwa imibuzo nge- email mayelana nalolu daba kodwa leyo mibuzo ugcine engayiphendulanga kwaze kwashaya isikhathi sokushicilela, nakuba ubekuqinisekisile ukuthi uyitholile leyo mibuzo.
Inkampani idreamcatcher, nayo ebuye ikhulumele lo mdlalo, ithunyeleliwe imibu- zo efanayo kodwa nayo ngokunjalo igcine ingaphendulanga kwaze kwashaya isikhathi sokushicilela.
Uzalo lukhonjiswa phakathi nezinsuku esiteshini I-SABC 1 kanti luhamba phambili ngokwesibalo sababukeli eningizimu Afrika.