Izihlinzele ezibini i-orlando Pirates
Unozinti webucs uzingqubuze epalini kukubi
IYEKE ithuba lokuhlala esicongweni i-orlando Pirates ibambana nefc Platinum yasezimbabwe ngo-0-0 emdlalweni wala makilabhu wokuvula isigaba samaqoqo kwigroup B somqhudelwano wecaf Champions League izolo ngomgqibelo ntambama ebarbourfields Stadium, Kwabulawayo, ezimbabwe.
Ibucs neplatinum baye kulo mdlalo bazi kahle ukuthi ozonqoba uzohlala esicongweni kuleli qoqo njengoba ihoroya yaseguinea ne-esperance yasetunisia abakuleli qoqo bedlale ngokulingana kuba ngu-1-1 ngolwesihlanu.
I-esperance okuyiyona eyizingqwele zalo mqhudelwano, kulo nyaka igubha ukuhlanganisa iminyaka engu-100 yasungulwa.
Ibucs yiyona obekubhekwe lukhulu kuyona njengoba iyijwayele imidlalo yecaf ekubeni iplatinum ibiqala ukudlulela esigabeni samaqoqo kulo mqhudelwano.
Nokho akuthusanga ukubona la makilabhu engafiki mawala emapalini njengoba abaqeqeshi bawo bazana ukuthi banobuchopho obujulile kulo mdlalo.
Umilutin Sredojevic ocija ibucs ubevele eshilo ukuthi ngeke aye ngokuhlomeka kulo mdlalo.
Iplatinum iphekwa ngunorman Mapeza obecija isikwati sasezimbabwe.
Ushenxiswe kulo msebenzi ngo2012 esolwa ngezinsolo zokuphekwa kwemiphumela yemidlalo.
Ngaphandle kwalokhu, lo mqe- qeshi udlale isikhathi eside phesheya kwezilwandle njengoba egijime kwisokol Pniewy yasepoland ngaphambi kokudlulela eturkey lapho edlalele khona igalatasaray, i-ankaragucu, i-altay SK nemalatyaspor, kanti ubeyingxenye yesikwati segalatasaray esigijime kwiUefa Champions League.
Ubuchopho bukamapeza buvelile kulo mdlalo njengoba abadlali bakhe bebengayiniki ithuba ipirates esiswini okuyindawo emandla kuyona nxa ihlasela.
Ibucs igcine isiyenza amaphutha ayinqwaba emuva ngisho ezindaweni ezibucayi ngenxa yokudidwa yizinduku zikamapeza.
Ukuhlasela kweplatinum kuholele ekutheni asebenze kanzima ujackson Mabokgwane obesezintini zebucs, okuphethe ngokuthi azishayise epalini ebamba elinye lamabhola anzima abethunyelwa yiplatinum.
Lo nozinti uphinde wathunukala sekusele kancane ukuba kuphele isiwombe sokuqala, kodwa wakwazi ukuqhubeka njengoba ewuqedile umdlalo.
Ipirates ihluleke ngisho isichibiyele ngo-augustine Mulenga endaweni kajustin Shonga, uvincent Pule ongene endaweni kakudakwashe Mahachi nolinda Mntambo ongene kwekaxola Mlambo.
Ibucs iqale lo mdlalo ngabadlali ababili basezimbabwe okunguMahachi nomarshall Munetsi, ababuye badlalele isikwati esikhulu sakuleliya lizwe elingumakhelwane weningizimu Afrika.
Ibucs ihlulwe wukubuya namaphuzu aphelele nje, bebephume ngezinkani abalandeli bayo baKwabulawayo, okwenze kwakaze kwabonakala ukuthi idlala ekuhambeni.
Nabalandeli bepirates baseningizimu Afrika badele imali yabo bayoyeseka kulo mdlalo beholwa ngumgijimi wodumo lokuzipenda ngokumhlophe emzimbeni emidlalweni yepirates.
Ibucs bekulindeleke ukuthi igeze igama leningizimu Afrika kulo mqhudelwano njengoba imamelodi Sundowns ihlulwe yilobi Stars yasenigeria ngo-2-1 kokaGroup A ngolwesihlanu ekuha- mbeni ekubeni kuyiyona eyivakashele kuqala inethi.
Idowns izokwamukela iwydad Athletic Club yasemorocco ngoMgqibelo womhla ka-19 kwephezulu, kanti ibucs yona izosingatha ihoroya ngolwesihlanu mhla ka-18 kwephezulu emdlalweni wesibili.