KUSHONE AMAPHOYISA EDUBULANA NEZIGEBENGU
UMBUTHO wamaphoyisa eningizimu Afrika, isouth African Police Service (SAPS), uphinde wagubuzelwa yifu elimnyama ngemuva kokwedlula emhlabeni kwamalungu awo amabili, esigamekweni okufe kuso abantu abayi-9 esenzeke ngakwanongoma ngowesihlanu kusihlwa.
Umkhuzi omkhulu wamaphoyisa kuzwelonke, ujenene Khehla Sitole, wedlulisele amazwi enduduzo emindenini yalawa maphoyisa ashone kulesi sigameko.
Lawa maphoyisa ashonile adubuleke ngesikhathi kutholana phezulu abasolwa okubikwa ukuthi bebebamba inkunzi imoto ethwala imali kanye namaphoyisa ophiko lwe-special Task Force (STF) nolwe-crime Intelligence (CI) ngolwesihlanu kusihlwa.
Ngokwesitatimende samaphoyisa, laba basolwa bahlasele imoto ethwala imali, basebenzisa iziqhumane ukukhipha imali.
Ngenxa yokuthi amaphoyisa abevele ehlalele phezulu ngemuva kokuthola umbiko wezobunhloli obuthi kukhona imoto ethwala imali ezobanjwa, asukumele phezulu, asheshe afika endaweni yesigameko kwasuka esinamathambo, kwakhala inganono, kudubulana izigebengu nawo amaphoyisa.
Elinye iphoyisa lesifazane okubikwa ukuthi lidubuleke emlenzeni lisindile.
Kulesi sigameko kutholakale izibhamu ezinkulu zohlobo lweAK47 kanti imoto yohlobo lweBMW okubikwa ukuthi ibisetshenziswa ngabasolwa kuthiwa ike yasetshenziswa nakwezinye izigameko zobugebengu okubalwa kuzo nesokubamba inkunzi egaraji lakwashell, Kwanongoma.