U-ANELE AKAZISOLI NGOKWESEKA UTHISHA
USAZIWAYO ongumethuli wezinhlelo, u-anele Mdoda ( osesithombeni), uthi akajiki emazwini akhombisa ukuba sohlangothini lukathisha obesematheni waseSans Souci Girls’ High School, ecape Town, okuvele i- video yakhe esakaza ngempama umfundi kaGrade 9 ngemuva kokuhilizisana ekilasini.
Selokhu isabalele kusuka ngoLwesithathu le video isibe ngundabamlonyeni, abanye bevuna uthisha, abanye bevuna umfundi, kanti kukhona ababagxeka bobabili ngalesi senzo.
U-anele uthe akusiwo umsebenzi wothisha ukufundisa izingane ukuziphatha kodwa lokhu kumele zikufunde ekhaya.
“Umsebenzi wothisha wukuzipha ulwazi lwemfundo, hhayi lokuziphatha. Nalokho bazokwenza kanjani uma zisalibele wukunaka izingcingo kunokufunda? Hhayi babhekene nengwadla othisha! Ngebhadi lokhu esikubona kusabalala ezinkundleni zokuxhumana kuncane kunalokhu okwenzeka ngaphandle nasezikoleni.”
Uthi akekho amvunayo kulesi sehlakalo kodwa iqiniso limile ekutheni umfundi bekumele kube khona okumkhumbuzayo ukuthi uthisha mdala kunaye futhi kumele amhloniphe.
Kule video kubonakala uthisha nalo mfundi behilizisana ngenxa yebhuku. Kubonakala lo thisha ephuca umfundi umakhalekhukhwini wakhe, embuza ukuthi uwuphatheleni ngoba lokhu kuphambene nomthetho wesikole.
Kube sekuqala impi yamazwi okugcine ngokuba lo thisha amxoshe lo mfundi ethi makaphume ekilasini kodwa wagoloza, wakhipha igama eliyinhlamba. Lo thisha uzwakala embuza ukuthi “ngabe uyangithuka? Ukhuluma ulimi engingaluzwa ekilasini lami?”
Uthisha ube esekhuluma ngesiBhunu ephusha itafula ekhulumela ebusweni balo mfundi. Nomfundi ube eseliphushela kuthisha itafula wasukuma eqonde ngqo kuyena.
Kuthe lo mfundi esathi usikaza uthisha, kwaqhuma ulabhabha wempama evela kuthisha, kwamemeza abafundi ekilasini. Uthisha nomfundi bamisiwe esikoleni kanti bazobhekana nokuqondiswa ubugwegwe.
Bheka ikhasi 12