Kuphazamiseke itravel Indaba
Lbishayisana nosuku lokuvota
UKUMENYEZELWA kosuku lokuvota okhethweni lukazwelonke eningizimu Afrika, okungumhlaka-8 kunhlaba (May), sekuphazamise izinhlelo zombukiso wezokuvakasha omkhulukazi e-afrika, itravel Indaba, oba minyaka yonke ethekwini.
Lolu suku lumenyezelwe nguMengameli wezwe, umnu Cyril Ramaphosa, ngesikhathi ethula inkulumo yesizwe ephalamende ngolwesine kusihlwa.
Ngenxa yokuthi lolu suku lushayisana nezinsuku obekuhlelwe ukuthi kwenziwe ngazo itravel Indaba, sekuphoqe ukuba abahleli balo mcimbi, okuyiSouth African Tourism (SAT), bawuhlehlise.
Nonyaka itravel Indaba ibizodonsa kusukela mhlaka-06 kuze kube wumhla ka 09 kunhlaba, nokuyisona sikhathi evame ukwenziwa ngaso minyaka yonke, enkosi Albert Luthuli International Convention Centre (ICC). Yona I-ICC ibuye isetshenziswe njengesikhungo esikhulu esifundazweni okubalelwa kuso amavoti.
ABESAT bakuqinisekisile ukuthi bazowuhlehlisa lo mcimbi ukuze ungashayisani nokhetho, nokho ukuhlehliswa kwawo kubukeka kungase kuphazamise izicukuthwane eziwuhambelayo ebesezivele zizenzile izinhlelo, okubandakanya kuzo ukubekisa izindawo zokuhlala emahhotela, nokuthenga amathikithi amabhanoyi.
Esitatimendeni esikhishwe YISAT, ichief Ecexutive Officer, usisa Ntshona, ithe njengamanje bazobheka ezinye izindlela zokuhlelela lo mcimbi ngemuva kwalesi simemezelo sikamengameli.
Uqhube wathi kusamele baxhumane nabo bonke abathintekayo, okubalwa kubo nezihambeli zalo mcimbi, mayelana nokuhlehliswa kwawo.
I-tourism Business Council of South Africa (TBCSA) nayo iphawulile ngalesi simo.
Untshona ugqugquzele abahambela lo mcimbi ukuba bawethamele ngosuku olusha oluzomenyezelwa, wathembisa ukuthi uzobe usewumcimbi omuhle kakhulu okumele wethanyelwe.
Lo mcimbi uhanjelwa yizinkumbi zezicukuthwane ezibalelwa ngaphezu kuka-7000, eziqhamuka emazweni abalelwa ku-80 emhlabeni jikelele.
bhekin@ilanganews.co.za