Kumsizile ukuba nenkani utellaman
MCULI wehip hop odume ngelikatellaman uthi uthathe isikhathi eside epheka i- album yakhe entsha esihloko sithi “God Decides”, ngoba ubezimisele ngokuba ibe wulozolo.
Lo mculi ogama lakhe langempela nguthelumusa Owen ongowaseNewlands West ethekwini kodwa osezinze egoli, uzakhele igama kwezomculo ngokuba namakhono ahlukene okungelokubhala izingoma, ukukhiqiza umculo nokuphinda acule. Useke wasebenza nabaculi abahlonishwayo okubalwa kubo UDJ Speedsta, Aewon Wolf, Gemini Major, Shane Eagle, Nasty C, Frank Casino nabanye.
Uthi njengoba ebesagxile ekusebenzeni nabanye abaculi, engakakhiphi eyakhe i- album yingoba besingakafiki esakhe isikhathi. Engxoxweni ekhethekile abe nayo NELANGA Langesonto uthe: “Bengisajabulela ukusebenza nabanye abantu kodwa kuthe uma kufika u-2019 ngezwa ukuthi sekuyisikhathi esifanele sokuba sengingakhipha eyami i- album,” kuchaza yena.
Uthi selokhu wangena emculweni uthando aluthola kubantu ngomculo wakhe luyamangalisa. Ebuzwa ukuthi umculo wakhe uwufaka ngaphansi kwaluphi uhlobo uthe: “Angisiye umuntu othanda ukuzivalela, ngithanda ukungena kuzo zonke izinhlobo zomculo. Ngiyathanda ukuzama izinto ezahlukene,” kuqhuba yena.
Uthi izingoma ezikule album yakhe ziyi-r&b kanti usebenze kuyo nogemini, Nobble, Shekinah, unasty C, utiwa nabanye. Iningi lezingoma ezikuyo zigxile othandweni. Echaza ngayo uthe: “Imayelana nami nokuzama ukubhalansisa umculo nempilo yami yangasese. Iphethe umculo omnandi nothando,” echaza.
Phakathi kwezingoma athi abantu bazozithokozela ubala ethi Practice, Rainbow Girls nethi No Sharing.
Utellaman uqokwe kwi-apple Music Pan-african New Artist Spotlight, nokusho ukuthi umculo wakhe uzozwakala uphinde ubonakale e-afrika jikelele esikhathini esingangenyanga.
“Ngijabule kakhulu ngaleli thuba nokuthola uthando nokwesekwa. Ngiyethemba abantu bazoyithokozela i-god Decides njengoba nami ngikuthokozele ukuyididiyela.”
Njengoba kuye kuvele ukuthi osaziwayo abasendimeni yezikaqedisizungu iningi labo lidla izidakamizwa, utellaman uphawule wathi kubalulekile ukuzazi ukuthi ungubani, ungenzi okubona kwenziwa ngabanye abantu.
“Kangisiyo ingelosi kodwa kubalulekile ukuba uziphathe kahle.
Ngeke ngakugqugquzela ukusetshenziswa kukatshwala nezidakami
zwa,” echaza.
Uthi bekungelula ukungena emkhakheni wezikaqedisizungu ngenxa yokuthi umndeni wakhe ubungakuthandi lokho, ucabanga ukuthi angase agcine esengene kwizidakamizwa noma umculo wakhe ungadayisi.
“(Ngesinye isikhathi) Inkani iyasiza, ungabalaleli abanye abantu ukuthi bathini. Ukuba ngalalela ngabe kangikho la ngikhona. Nokusebenza kanzima kukho konke okwenzayo kubalulekile,” kuqhuba yena.
UGQUGQUZELA INTSHA UKUBA IVOTE
Njengoba kuza isikhathi esibalulekile sokuvota eningizimu Afrika, ugqugquzela intsha ukuba ibe yingxenye yoguquko. “Ngigqugquzela wonke umuntu ukuba avote ukuze abe nezwi. Uvotele inhlangano ocabanga ukuthi izokwenza lokhu okufisayo,” kuphetha yena. Kusukela manje uthi uzobe ematasa nomjikelezo wokuvakashela amanye amazwe nokwenza ama- video e- album
yakhe.
AKAYIGUBHI IVALENTINE’S DAY
Uthi unaye ahlekisana naye kwezothando.
“Yize kungesiyo into engingathi i- serious kodwa siyathandana futhi sijabulile kakhulu,” ehleka kancane echaza nokuthi akasiye umuntu ogubha ivalentine’s Day. tzondi@ilanganews. co.za