2. NGASHA WUTHANDO, SIZANI!
NGINENKINGA, ngahlukana nomyeni wami sinengane eyodwa kodwa akuvumi ngithande omunye kanti yena usenomunye umakoti. Kumanje sikhuluma eyokubuyelana kodwa ungibona nje ngaleso sikhathi, angikwazi ngisho ukumfonela kufona yena kuphela. Sizani bo, ngafa wuthando. Ngenzenjani?
IMPENDULO: Ngiyayizwa indaba yakho nokho ithanda ukuba bucayi. Ukuba uthe qaphu mayelana nesizathu esanehlukanisa bengingasizakala ekubeni ngikwazi ukukuphendula ngendlela engcono.
Okungesabisayo nje ngale ndaba yakho wukuthi ngibona ingozi yokuthi uzibangele inhliziyo ebuhlungu kakhulu nokuhlukumezeka emphefumulweni nasengqondweni ngaphezu kwalokhu obhekene nakho. Lokhu ngikusho ngoba uthi lo muntu wakho usenomakoti, okusho ukuthi yena uqhubekile nempilo, wasala wena ubambelele.
Khona lapho nikhuluma eyokubuyelana. Ngaphezu kwalokho wena awukwazi ukumbona nokukhuluma naye ngesikhathi ofisa ngaso, kodwa konke kuncike ekubeni yena usenza nini isikhathi sokukubona noma sokukufonela.
Dadewethu, kuyahlukumezana futhi kuyawephula umoya ukungakwazi ukuxhumana ngendlela ofisa ngayo nomuntu omthandayo. Kungakudalela enkulu ingcindezi engingakholwa nokho ukuthi uyayidinga.
Okunye engizibuza khona ukuthi nikhuluma eyokubuyelana nje, ngabe yena uzimisele ngempela yini ngawe njengoba wena uzimisele noma nje usenzela wena.
Engingakusho kuwe wukuthi ungalenzi iphutha lokuncenga umuntu ongasakuthandi ukuba akuthande - angisho ukuthi lo mlisa akasakuthandi, kodwa ngifuna uvule amehlo.
Ukwehlukana nomuntu kuyinto engelula vele, ikakhulukazi uma umuntu usamthanda kodwa uyaqinisela, ukhale zome, size siphole isilonda enhliziyweni nakuba kuthatha isikhathi eside.
Ngicabanga ukuthi udinga nokwelulekwa ngokwengqondo ukuze uzokwazi ukubhekana nalesi simo. Awuzinike isikhathi uyicabangisise le ndaba.