Nguyena owokuqala ukuba nemoto emndenini

UZITHWESE ijoka lokutakula umndeni wakhe osizini uluckboy Mokoena (24) ongumdlali wehighlands Park egijima kwiAbsa Premiership.

Umokoena udabuka ekoppies, efree State lapho efunde khona amabanga aphansi ngaphambi kokudlulela ekwakwasi Secondary School.

Ngenxa yesimo esasingesihle ngakwezomnotho ekhaya, uphoqelekile ukushiya isikole wajoyina ihamorny Academy nokuyilapho ebone khona ukuthi uma engazimisela engakwazi ukuziphilisa ngezemidlalo.

Usuke lapho wajoyina ikaizer Chiefs Development ahlale kuyona iminyaka emibili ngaphambi kokudlulela kwibidvest Wits ajoyine isikhungo sayo sokuthuthukisa ibhola.

Akuphelanga sikhathi esingakanani yamyusela esikimini esikhulu kodwa ngenxa yokungasitholi isikimu yambolekisa kwimpumalanga Black Aces ebisanda kukhushulelwa esigabeni esikhulu.

Ukhule edlala imidlalo eyahlukene kubalwa ikhilikithi nonobhutshuzwayo nokuyiwona ogcine umngena kakhulu egazini.

Ukwenza kahle kwakhe ebholeni kumdonsele iso labaqeqeshi beqembu lesizwe lika-u/20.

Ukungabi nenhlanhla yokuthola ijezi kwenze wantanta emakilabhini amaningi akuleli okubalwa kuwo ichippa United, Ga-rankuwa United, F.C Cape Town nereal Kings.

Lo mdlali oyibamba ophondweni lwesokudla emuva ujoyine ihighlands Park ngomasingana (January) nyakenye emthenge kwikings.

Ukwenza kahle kwakhe kuholele ekutheni aqale imidlalo kuleli qembu eliqeqeshwa ngu-owen Da Gama.

Lo mdlali osemncane uthi ukubekezela yikhona okumsize kakhulu kulezi zimo adlule kuzo kwazise ukuba kwakungomunye umuntu wayengasheshe adikibale njengoba ehambe emakilabhini amaningi akuleli.

Isifiso sakhe esikhulu wukubona ihighlands izinza kulesi sigaba kwazise ibuya kwinationa First Division (NFD). Umokoena uthi angakujabulela ukudlulisela ulwazi lwakhe entsheni uma esebeke amakhokho ethala kwazise usefunde lukhulu ebholeni.

Ukholwa wukuthi intsha kufanele izimisele ezifundweni kuqala ngaphambi kokuba idlulele ebholeni. Uthi kuningi engakuzuza kwazise imfundo iyona ebaluleke ukudlula ibhola ngoba lona liyinto yesikhashana. Ingxoxo kaMokoena ne

LANGA Langesonto

( I/ L) ngempilo yakhe yangaphandle kwenkundla ihambe kanje:

I/ L: Ngabe ukhule ungumuntu onjani?

Mokoena: Ngingumuntu okhululekile futhi ozithobile okwaziyo ukuhlalisana nabanye abantu. Ngithanda ukuhlala ngijabule yingakho ngiyaye ngenze isi- qiniseko sokuthi ngiyaziqhelelanisa nezinto ezingiphatha kabi.

I/ L: Ukhulele ekhaya elinjani?

Mokoena: Ngikhulele ekhaya elingamile kahle ngakwezomnotho nokuyikho okungiphoqe ukuba ngilifulathele ngisemncane ukuzama ukulungisa isimo ekhaya.

Ngihambe ngineminyaka engu15 yobudala ngoba ngibona ukuthi kufanele ngisize umndeni wami.

Ngenhlanhla ngikwazile ukuphumelela kwazise abazali bami bebengeseka kukho konke engikwenzayo nengikholwa ukuthi yikhona okungiphumelelisile.

I/ L: Ngabe abazali basekhona?

Mokoena: Ubaba udlule emhlabeni ngo-2014 ngisele nomama kuphela futhi uyikho konke empilweni yami.

I/ L: Nibangaki kwenu?

Mokoena: Sibabili kuphela nodadewethu umatshidiso Mokoena

I/ L: Uyakwazi ukupheka?

Mokoena: Yebo ngiyakwazi kwazise ngizihlalela ngedwa akukho engingakwazi ukukwenza.

I/ L: Hlobo luni lokudla olukhonzile?

Mokoena: Umuntu ukhule edla yonke inhlobo yokudla ikakhulukazi ispinach nobhontshisi kwazise ukhule kanzima. Njengamanje konke engikudlayo kuba nenyama phakathi ngenza isiqiniseko sokuthi ayisali.

I/ L: Ngabe usushadelwe?

Mokoena: Cha angikashadelwa kodwa sengikwenze konke sekusele ilanga lomshado nje kuphela.

I/ L: Bangaki abantwana?

Mokoena: Uyedwa vo enginaye igama lakhe ngulethabo Happiness Mokoena.

I/ L: Uke washelwa umuntu wesifazane?

Mokoena: Cha akukaze kungehlele angazi nokuthi ngiyomphendula ngithini njengoba ngiwumuntu ozithulelayo

I/ L: Ugijima ngamotoni?

Mokoena: Ngihamba ngebmw 1 series. Ngingowokuqala emndenini ukuba nemoto.

I/ L: Yisiphi isipho osuke wasipha umama wakho?

Mokoena: Kuningi kakhulu engihlala ngikwenzela umndeni wami ngingabala kushone ilanga.

I/ L: Uphatha nhloboni kamakhalekhukhwini ?

Mokoena: Ngiphatha i-iphone 8.

I/ L: Ngabe ukhona ezinkundleni zokuxhumana ?

Mokoena: Yebo ngikhona kodwa angijwayele ukungena kuzo kuba nje yileso sikhathi.

I/ L: Yini oqala ngokuyenza mawuvuka ekuseni ?

Mokoena: Njengomuntu okholwayo ngiyaye ngithandaze kuqala bese ngidlulela kumakhalekhukhwini wami.

I/ L: Yiliphi izwe ofisa ukulivakashela phesheya kwezilwandle?

Mokoena: Isespain ngilithanda kakhulu leliya lizwe ngingakujabulela ukuya khona ngelinye ilanga.

I/ L: Usawukhumbula umholo wakho wokuqala?

Mokoena: Yebo ngangikwiwits kwaba ngu-r5000 kwakuyimali eningi kabi kwazise ngangisemncane kakhulu ngaleso sikhathi.

I/ L: Yimalini osuke wayibhubhudla nosondelene nabo ngobusuku obubodwa?

Mokoena: Njengoba ngishilo ukuthi ngivela emndenini ongamile kahle ngiyaqikelela ukuthi ngiyonga ngaso sonke isikhathi imali.

I/ L: Ngabe ikhona ikilabhu kanobhutshuzwayo ozifelayo ngayo?

Mokoena: Yebo ngisakhula bengithanda ikaizer Chiefs kodwa manje sengithanda ihighlands Park kanti phesheya kwezilwandle ngizifela ngebarcelona.

I/ L: Ugcine nini ukukhala?

Mokoena: Angisakhumbuli kahle kodwa kade ngagcina.

I/ L: Usichitha kanjani isikhathi uma ungekho matasa?

Mokoena: Ngiyaye ngizipholele nabangani bami noma ngiziyele ezitolo.

I/ L: Yiluphi uhlobo lomculo oluthandayo?

Mokoena: Ngidlala umculo ohlukahlukene kodwa engiwudlala kakhulu owokholo.

I/ L: Yini ofisa ukuyizuza eminyakeni emihlanu ezayo?

Mokoena: Ngifisa ukunqoba izicoco nekilabhu yami kodwa engingakujabulela kakhulu ukubona ikilabhu ihlala esigabeni esikhulu bese kuthi ngesizini ezayo sesingaqala sibheke ukuqeda kwi- top 8.

I/ L: Uyakholelwa ezintweni zesintu?

Mokoena: Yebo ngiyakholelwa kuzo yize noma ngiwumuntu okhonze ukuthandaza isikhathi esiningi.

I/ L: Umbala onjani owuthandayo ?

Mokoena: Angisiyena umuntu okhonze kakhulu imibala ngiyaye ngigqoke noma yimuphi engisuke ngiwuthandile ngaleso sikhathi.

I/ L: Yiluphi uhlobo lwesilwane olukhonzile?

Mokoena: Anginaso engingathi yisona engisikhonzile kodwa ngiyathanda ukuzibukela eduze.

I/ L: Iyiphi i- soapie okhonze ukuyibuka?

Mokoena: Angisiye umuntu okhonze kakhulu umabonakude into engiyibukayo yibhola nje kuphela.

I/ L: Ungabeluleka uthini abazali ukweseka izingane zabo kwezemidlalo.

Mokoena: Kufanele bazeseke ngayo yonke indlela kwazise kuyaphileka ngezemidlalo kodwa kufanele kuqalwe esikoleni kuqala ngaphambi kokuba kufikwe ebholeni, ibhola liyinto yesikhashana.

ISITHOMBBE NGABE: BACKPAGEPIX ULUCKY nendodakazi yakhe ulethabo Happiness Mokoena. NAMUHLA kule ngosi sikuphathele ulucky Mokoena odlalela ihighlands Park.

ULUCKY egijima kumajita (SA U/20).