BAFUNA UKUSUSA I-BAY EHLATHINI
BAFUNA ukusiza ikilabhu yabo ingene kwi-absa Premiership abadlali berichards Bay FC ekhombisa ukuba sefomini kulezi zinsuku.
Ibay izobhekana necape Umoya United kowenational First Division (NFD) namuhla ngesonto ngo-15h30 emhlathuze Sports Complex, erichards Bay.
Ibay ibukeka ivukile emaqandeni njengoba ishaya kwasani eza phambi kwayo.
Iya kulo mdlalo ihambela phezulu njengoba ngeledlule ihlule ngo-2-1 ITS Sports kuyo le nkundla.
Le wini ibuyise ithemba lokuthi ingangena kweyokuhlungela ukungeka kwi-absa Premiership njengoba isilele endaweni yesihlanu kwilog.
Umichael “Mashelela” Gumede ( osesithombeni) ongumdlali webay ongalibheki ipali kule kilabhu uthi benozakwabo sebekubeke emahlombe ukuthi bafake le kilabhu kwiAbsa Premiership.
“Indawo esikuyona isenza sibe nethemba lokuthi sisengangena kweyama- play off inqobo nje sizoqhubeka nomgqigqo wethu omuhle.
"Sinozakwethu sesikubeke emahlombe ethu ukuthi silwele wonke amaphuzu kuze kube kuyophela isizini.
"Ithuba sisenalo yikhona nje ukuthi kufanele sisebenze ngokweqile manje asisekho isikhathi sokudlala.
"Umdlalo wanamuhla uzoba nzima ngoba sidlala nekilabhu elwela ukuvika izembe.
"Kodwa-ke ngiyathembisa ngeke isehlulele ekhaya, ebay angeke sidedele lutho lokho ngingakuqinisekisa,” kusho ugumede.
Ugumede ungomunye wabadlali abamqoka kule kilabhu njengoba engalibheki ipali.
Nguyena ohamba phambili kwiBay ngokuhlohla amagoli njengoba eseshaye angu-6 ngale sizini.
Isiyonke imidlalo YENFD enamuhla ngesonto iqhathwe kanje:
Emhlathuze Sports Complex: Richards Bay FC vs Cape Umoya United 15h30.
Ekameelsrivier: TS Galaxy vs Real Kings 15h30.
E-athlone: Ajax Cape Town vs Tshakuma Tsha Madzivhandila FC 15h30.
Kabokweni: TS Sporting vs Maccabi FC 15h30.