Uzicelela u-kiss uberita
Uthi usefunde lukhulu kule ndima
UBERITA, ogama lakhe langempela ngugugulethu Berita Khumalo, uthi ufuna abesifazane uma bebuka yena bazi ukuthi likhona ithemba endimeni yomculo.
Uthi kule ndima kunamathuba abesifazane abancishekayo wona ngenxa yobulili. Kwesinye isikhathi uthi kudingeka ukuba basebenzise imizimba yabo ukuze baphumelele nokuyinto engalungile.
Ungomunye wabesifazane asebezakhele igama emculweni we-afro Soul, muva nje ukhiphe i- single esihloko sithi “Ndicela i- kiss”.
Enkulumeni ekhethekile abe nayo NELANGA Langesonto, uthe indlela okwamukelwe ngayo ingoma yakhe imenze wazizwa ethobekile.
“Abantu bayayithokozela, emsakazweni iyadlalwa nakuma- show engicula kuwo abantu sebeyayicula. Ngizizwa ngibusisekile kakhulu,” echaza.
Utshele leli phephandaba ukuthi kuyamthokozisa ukukhiqiza umculo ongaphelelwa yisikhathi, ozohlala ezinhliziyweni zabantu. Eminyakeni ewu-7 esendimeni yomculo uthi bekungelula.
“Ngibe nezingqinamba eziningi kodwa ngenxa yokuthanda umculo nokuba nesineke ngisekhona. Zike zafika izikhathi lapho ebengike ngizibuze ukuthi ngiqhubeke yini kodwa ngoba umculo kimi uyisipho esivela kunkulunkulu ngisekhona namanje,” kuqhuba uberita.
Lo mucu awukhiphile ungowokuqala awukhiphe ngaphansi kwenkampani yakhe, uthi lokhu kusho lukhulu kuyena.
“Kusho ukuthi sengikhulile njengoba sengikwazi ukuzimela. Ukusebenza nabantu abafana nomama Yvonne Chaka-chaka, u-oliver Mtukudzi nohugh Masekela kungifundise lukhulu,” kusho yena.
Uthi maduze uzobe esekhipha i- album egcwele asayipheka njengamanje. Uthi abalandeli bakhe ngeke baphoxeke nakancane uma eseyidedela.
Ebuzwa ukuthi ukhona yini ahlekisana naye njengoba esecela u- kiss, uvele waphela yinsini.
“Ukhona engithandana naye, kumnandi kakhulu, kodwa ngeke ngikwazi ukuphumela obala ukuthi ngubani.”