Kufezeke umbono wefountain of Life
KUFEZEKE umbono webandla ifountain Of Life Family Church International efolweni ngempelasonto, ngesikhathi leli bandla linikelela abafundi abangu-20 ngamanyufomu amasha ceke.
Leli yibandla eliholwa ngumbhishobhi Sibongiseni Msomi noMbhishobhikazi Lindi Msomi. Umcimbi ubuhanjelwe ngabazalwane ebebevela nakwamanye amabandla futhi nezingane ebezizokwemukeliswa amanyufomu, bekungezona ezebandla kuphela.
Umbhishobhi Msomi obephuphuma intokozo uthe: “Umbono wethu njengebandla ukuhamba ezinyathelweni zenkosi ujesu owakwazi ukubona ukuthi abantu balambile, wandisa izinhlanzi nezinkwa kwasutha inqwaba yabantu.
“Nathi sihamba kulowo mgudu wokuba singashumayeli ivangeli lokuyisa abantu ezulwini kepha sikwazi ukubondla besaphila kulo mhlaba. Akukho okungangena ezindlebeni zomuntu olambile. Lo mcimbi siwenza minyaka yonke ngokuba siye ezikoleni zalapha sizicele ukuba kube yizo ezihlonza labo bafundi abadla imbuya ngothi.”
Umbhishobhi Msomi ubonge kakhulu osomabhizinisi abaxhase ngezimali nangamanyufomu ezingane. Abanye babo bathembise ukuqhubeka nokuluxhasa lolu hlelo.
Kuyo le nkonzo ngaphambi kokufundwa kwezwi, elethulwe yisishingishane somphostoli Musa Khwela webandla ijesus Restores Ministries International ebluff ethekwini, kusukume umnu Mthobisi Sabelo nonkz Sindisiwe Buthelezi bethula ubufakazi ngosizo abalunikezwe yilolu hlelo lwebandla. Bobabili basebenza imisebenzi emihle, babonge amandla evangeli nemikhuleko yebandla labo.
Umphostoli Khwela uphakele abazalwane basutha ngezwi alicaphune encwadini yamahubo 68, ivesi lesi-5 kuya kwelesi-6 lapho kufundeka khona kanje: “Uyise wezintandane umehluleli wabafelokazi, unkulunkulu endlini yakhe engcwele, unkulunkulu ohlalisa endlini yakhe imihlalaqha ezindlini, akhiphele iziboshwa ekubuseni; ngabahluphekileyo bodwa abakhe ezweni elomileyo.”
Uphinde wafunda nencwadi kasamueli 9.
Umphostoli Khwela uqale intshumayelo yakhe ngokuthi ibandla liyinsika yeqiniso, lakha imindeni.
“Kumele ukuthi lapho kukhona ibandla kubonakale umphakathi waleyo ndawo usizakala, ulubone usizo lwalo. Ibandla alibe yintaba yasesiyoni, abantu bakhuphukele kuyo bathole ukuphila. Bamemeni abantu beze enkonzweni.
“Ukushiya inkonzo yakho owazalelwa kuyo ngezizathu ezibonakalayo akusilo iphutha. Ngeke uhlale endaweni engayi phambili ngoba nje uthi wazalelwa kuyo yize ubona ukuthi ayikuyisi ndawo. Abazali banayo imithetho emakhaya kodwa banquma ukuyisa izingane zabo ezikoleni ukuze zithole ulwazi oluthe xaxa kunasemakhaya azo.
“Akubona ubuxoki ukushintsha ibandla, kuphela uma lapho (uya khona) kuseyibandla likakrestu elishumayela ukuphila okuphakade linezinto ezingekho ebandleni okulo,” kusho umphostoli Khwela.
Ugxile odabeni lukasawule owahamba eyofuna izimbongolo zikayise ezazidukile kanti kuyisu likankulunkulu ukuba abonane nomphrofethi Samuel owadalula izindaba zokuthi uzoba yinkosi esizweni sakwa-israyeli futhi asikhulule ebugqilini bamafilisti yize wayephuma endlini encane kabenjamini.
Umphostoli uveze ukuthi lapha unkulunkulu ukhombisa ukuthi usebenza ngabantu, zimbalwa izigameko lapho wayezikhulumela khona ngqo nabo.
“Yingakho kubalulekile ukuba abantu bavume ukuholwa ngabagcotshwa bakankulunkulu. Noma izwi lenkosi lingaba yinsada litholakale ngazozonke izindlela kepha kusemqoka ukuba abantu baye ezinkonzweni, baqondiswe futhi baholwe. Ngokuzalana kwabantu unkulunkulu wayehlose ukuba abantu basizane omunye nomunye. Akulungi ukuba umuntu aziphilele yedwa, kumele sibe njengesikimu sebhola enkundleni,” kugcizelela umphostoli Khwela.
Abezokuphepha bebekhona nomphathisiteshi wamaphoyisa efolweni, ucol Thembinkosi Ngisi, bezokhuthaza ukuzwana kwabantu emphakathini, bakhuza ukuhlukunyezwa kwabantwana nabesifazane, bathi bazimisele ukusebenzisana nomphakathi ukuze baluqonde usizi lwawo bangagcini ngokubopha.
knowledge.simelane@ilanganews. co.za