Imoringa oleifera yempilo
Ilwa nezifo eziningi emzimbeni
KUSUKELA kudala amakhambi esintu abehamba phambili ekwelashweni kwezifo eziningi emakhaya. Ngesinye isikhathi bekungadingi ukuba umuntu aze aphuthunyiswe kudokotela olapha ngendlela yasentshonalanga kodwa bekuvele kusetshenziswa izihlahla ezithile, umuntu asizakale aphile.
Nakuba abanye basakholelwa ekusetshenzisweni kwamakhambi esintu kodwa baningi asebencamela amakhambi abawathola kodokotela abasebenzisa indlela yokwelapha yasentshonalanga.
Olunye usizo lokwelapha lutholakala nakwezinye izinto ezitholakala emakhaya njenge: turmeric eyisinongo sokudla ongayithenga iyimpande noma iyimpushana, u- vinegar, ugwava, nokunye.
Namuhla sibheka ikhambi i- moringa elitholakala ezindaweni ezithile ezilisabalalisayo, kokunye nasezitolo zezinongo zokudla (spice shops) kwazise nayo i- moringa lena iyafakwa ekudleni.
Umlando omude wokusetshenziswa kwaleli khambi ngokwendabuko usuholele ekubeni kwenziwe ucwaningo ngalo, futhi olusaqhubeka namanje.
Lapha sibheka lolo olwenziwe ngumcwaningi, ukamal Patel, lwaqinisekiswa yithimba leExamine.com nolugcine ukubuyekezwa mhla ka 2 kumfumfu (October) 2018.
Ngokwalolu cwaningo i- moringa babona iwusizo kakhulu njengesengezo ( supplement)
esiyisikhucululi (antioxidant)
esinamandla ekuhlanzeni umzimba kanti injalo nje inezakhamzimba ezondlayo ngempela.
Lokhu okulandelayo ngokunye okubikwa ukuthi i- moringa iwusizo ngakho kwezempilo:
1. I-moringa inezakhamzimba:
Phakathi kwazo kubalwa lezi: vitamins A, C no-e minerals, calcium, potassium ne- protein.
2. Ikhuculula ukungcola:
Izikhucululi zayo zilwa nokungcola okubanga izifo, ivikele ukulimala kwama- cells kanti ucwaningo ngayo seluthole nokuthi amacembe ayo anengxube eyenza ama- cells azo zonke izitho zomzimba ukuba zisebenze kahle.
3. I-moringa ilwa neinflammation:
Le inflammation iholela ekuhlaselweni yizifo ezingamahlalakhona njengesifo senhliziyo, yisifo samathambo nokuzimuka ngokweqile.
4. Ilwa nezimpawu zesifo sikashukela:
Impushana ye- moringa inamandla okulawula izinga le- glucose namafutha egazini, okusho ukuthi iyakwehlisa lokhu futhi yenze ivikele ukulimala kwama- cells.
5. Ivikela uhlelo lokusebenza kwenhliziyo:
Lokhu ikwenza ngokuvimbela ukunqumela kwamafutha emithanjeni yegazi futhi inciphise umthamo wawo.
6. Yondla ubuchopho:
Ilekelela ekwenzeni ngcono impilo yobuchopho nokuhluza kwawo izimo ngoba ukuhamba kwemizwa kuba ngcono. Ilawula futhi ama- neurotransmitters iserotonin, dopamine ne- noradrenalin ebuchosheni nokuneqhaza elimqoka ekuthini ukhumbule, ukuzizwa emoyeni, ukusebenza kwezitho zomzimba, ukunanela emizweni yengcindezi neyentokozo.
7. Ivikela isibindi:
Iqukethe i- polyphenol eningi emaqabungeni nasezimbalini zayo, evikela isibindi ekungcoleni nokulimala. Amafutha ayo ayakwazi ukuvuselela ama- enzyme ngezinga elifanele. Phela isibindi eminye imisebenzi yaso ukuhlanza igazi, sakhe inyongo futhi sithake izakhamzimba ezitholakala ekudleni.
Lokhu sikwenza ngama- enzyme, ngakho kusemqoka ukuba amaenzyme ahlale ewumthamo ofanele. Isibonelo, uma umthamo we- hepatic enzyme uphansi, lokho kungathikameza amandla aso okuhluza ukungcola kwegazi.
8. Inamandla okulwa namagciwane ne-bacteria:
moringa 9. Isheshisa ukuphola kwenxeba:
Amandla ayo okwenza igazi linqamuke ukopha asemahlamvini ayo, ezimpandeni nembewu asiza ukuba inxeba lisheshe liphole ngokunciphisa isikhathi sokopha koklwebhekile.