Kuyishwa okwenzeka emakilabhini akwazulu-natal
UYISHWA elikhulu ukuthi ikwazulu-natal isimelwe yiLamontville Golden Arrows kuphela nje vo kwinedbank Cup obekuqhathwa amakilabhu azodlala kuma- quarter final ayo ngolwesine kusihlwa egoli.
Phambilini sike sakuveza ukuthi amakilabhu akulesi sifundazwe kufanele azinuke amakhwapha ngendlela akwenqena ngakhona ukulwela izinkomishi ezidlalelwa kwipremier Soccer League (PSL).
Amakilabhu akulesi sifundazwe kufanele akukhumbule ukuthi yimali yabakhokhi bentela le asizwa ngayo ngokuhlelelwa IKZN Premier’s Cup okusuke kuhloswe ngayo ukuthi alungiselele ukuqala kwesizini entsha.
Kasikho-ke isidingo sokuthi uhulumeni athathe imali okufanele isetshenziselwe ukuthuthukisa ezemidlalo emazingeni aphansi ayitshale emakilabhini amakhulu angakukhathalele nhlobo ukulethela isifundazwe izinkomishi. Akekho umuntu ojabulela ukuthi intela yakhe iphelele ezeni njengoba vele eningi iququdwa yizenzo zenkohlakalo okulokhu kubikwe ngazo kwabezindaba.
Kayikho incazelo engezwakala engachaza ukuthi kungani amakilabhu akulesi sifundazwe ehlulwe yits Galaxy necape Umoya United okungamakilabhu adlulele esigabeni sama- quarter final enedbank Cup. Igalaxy iyikilabhu entsha esanda kuthengwa ngutim Sukazi obeyimenenja yabadlali, kanti icape Umoya ibiyiplatinum Stars egencwe yizembe ngesizini edlule kwi-absa Premiership.
Kuyihlazo ukuthi kunamakilabhu amakhulu akwazulu-natal asephumile kulo mqhudelwano, kodwa lawa adlala kwinational First Division asayibambile. Yize sifikisela ngamahloni lesi simo, kodwa kufanele ishayelwe elikhulu ihlombe irichards Bay FC ekhishwe yibloemfontein Celtic esigabeni se- last 16.
Ibay isebenzile njengoba ikhiphe ifree State Stars esigabeni se- last 32, ekubeni ibiyizingqwele zalo mqhudelwano. Siyifisela impumelelo i-arrows kulo mqhudelwano njengoba sekuyiyona yodwa esithwele amathemba esifundazwe. Siyakuqaphela ukuthi selokhu kuqale inedbank Cup, i-arrows kayikaze ibe nenhlanhla yokutonyulwa ukudlalela ekhaya, kodwa ibuya nemiphumela egculisayo ekuhambeni.
Kumanje inomqansa njengoba itonyulwe ukuvakashela iceltic ekuhambeni. Ukuphuma kwe-arrows kulo mqhudelwano, kuyobe kusho ukuqhubeka kweshobolo lokuthi amakilabhu esifundazwe alokhu ebukela awakwezinye izifundazwe eshintshana ngokuqukula izinkomishi.
Ibaroka iyikilabhu encane futhi engenamlando kodwa inenkomishi yetelkom Knockout ekhabetheni layo. Icape Town City iyikilabhu esanda kubunjwa kodwa inenkomishi yetelkom neyemtn8 ekhabetheni.
Impumelelo yala makilabhu kufanele isuse inkungu ezikhulwini zebhola zakwaZulu-natal. Kufanele zipheze ukubiza abezindaba njalo ngokuqala kwesizini zizodalula ukuthi zihlose ukuqeda kwitop 8 nokwenza kahle emiqhudelwaneni yemikhumulajezi, kodwa zingaphumeli obala ngokuthi zifuna ukunqoba izinkomishi.
I-arrows nakwimultichoice Diski Challenge yiyona ekhombisayo ukuthi kukhona isifundazwe okuthiwa yikwazulu-natal njengoba isiwunqobe kabili lo mqhudelwano. Yiyona futhi le kilabhu kamato Madlala egcine ukunqobela isifundazwe inkomishi emqoka ngemtn8 ngo-2009.
philanin@ilanganews.co.za