KALIVUMI UKUPHOLA INXEBA LE-CHIEFS
Iyakhanya ebheke ehlathini kwiteam of Choice
KALIVUMI ukwelapheka inxeba lekaizer Chiefs ebambane nepolokwane City kuba ngu-1-1 emdlalweni we-absa Premiership izolo ngomgqibelo ntambama epeter Mokaba Stadium, epolokwane.
Igoli lezimpofana livalelwe enethini ngudaniel Cardoso kuyiphenathi ngomzuzu ka-15 kwathi eleRise and Shine lashaywa nguwalter Musona ngoka-21. Umusona ushaye leli goli engaphandle kwebhokisi laphuma ngaphansi kwekhwapha likadaniel Akpeyi ongunozinti wechiefs.
Ichiefs ibukeka ithwele kanzima ukubangula iva ephefumula nalo onyaweni njengoba iqhubeka inkinga epalini. Le kilabhu igqemeke ingozi engeqiwa ntwala ilinyalelwa ngu-itumeleng Khune ongunozinti wayo wokuqina.
Ichibiyele ngovirgil Vries waseNamibia. Lo nozinti ufake le kilabhu ehlazweni evuzisa amagoli awubungane ibhekene ngokwahlukana nemamelodi Sundowns neCape Town City, okuyiphuce amaphuzu amqoka.
Ukushaya udaka kukavries kuholele ekutheni le kilabhu ilande isigubhukane u-akpeyi wasenigeria obevimba kwichippa United. Lo nozinti uphonswe emphandlwini wamabhubesi njengoba umdlalo wakhe wokuqala kube yisoweto Derby lapho ichiefs ibambane khona ne-orlando Pirates ngo-1-1.
Inkinga yonozinti ibukeka ingaxazululeki kwichiefs njengoba izolo u-akpeyi engenelwe yigoli obekubukeka kulula ukuthi alivimbe kwazise ubengasithekile nakakhulu. Nokho-ke u-ernst Middendorp ongumqeqeshi wechiefs, kumele azigxeke yena ngokulahla amaphuzu amabili
kulo mdlalo.
Lo mqeqeshi ukhiphe uhendrick “Pule” Ekstein wafaka udumisani Zuma ngokuqala kwesiwombe sesibili.
Uzuma uvele wazibandela nje kulo mdlalo ekubeni u-ekstein ubeqhamuka neminyakazo ebiyenza zingakutholi ukuphumula izitobha zecity. Ukuvutha kukaEkstein kulesi siwombe yikhona okuholele ekutheni ichiefs ithole le phenathi egcine ivalelwe nguCardoso.
Ucardoso usephenduke isethenjwa sechiefs kumaphenathi njengoba bese eyivalela okwesithathu muva nje. Inikezwe yena emdlalweni nepirates, kanti nangempelasonto edlule ichiefs inenebula imagic FC kwinedbank Cup ithathwe nguyena njengoba eyikhahlelile nayizolo.
Ipolokwane iye kulo mdlalo ihambela phezulu ngemuva kokunqinda imamelodi Sundowns amandla okuhlala esicongweni selog yepremiership njengoba iyibambe ngo-1-1 phakathi nesonto.
* Ibukeka iqina indlela ebheke ehlathini yemaritzburg United edliwe yicape Town City ngo-3-2 koweligi izolo ngomgqibelo ntambama e-athlone Stadium, ecape Town.
Amagoli ecity avalelwe enethini nguthami Mkhize, ugift Links noriyaad Norodien kwathi aweteam of Choice aqotshelwa enethini ngumxolisi Kunene nofortune Makaringe.
Iteam of Choice iqede umdlalo ingasaphelele urushine De Reuk ethola ikhadi elibomvu ngesikhathi somusa kanondweba. philanin@ilanganews.co.za