BAYINKUKHU NEMPAKA ABASAKAZI BEGAGASI FM
Omunye usephenduke isichuse ohlelweni abalushayelayo
SEBEPHENDUKE inkukhu nempaka abasakazi begagasi FM, okubikwa ukuthi ababhekani nakuba besebenza ohlelweni olulodwa.
Kuthiwa simuncu isimo phakathi kukafelix Hlophe noflymotion (Sandile Makhanya), bobabili abangosomahlaya futhi abasakaza ngokubambisana uhlelo lwasemini olubizwa ngokuthi yimidday Shandis, olungena ngo-12pm kuya ku-3pm phakathi nezinsuku, abalusakaza nodj Lesoul (Nonkululeko Mdlalose).
Ingxabano yabo kuthiwa isiholele nasekubeni uflymotion ancisheke nombhobho ngezinye izikhathi, osekwenza afaniswe nesichuse ngenxa yokuthi akusaqondakali ukuthi kanti yena yiliphi elakhe iqhaza kulolu hlelo.
Ngisho nabalaleli sebekuqaphelile ukuthi kukhona okushaya amanzi.
Umthombo WELANGA LangeSonto uthi inkinga enkulu ekhona wukungabhekani phakathi kuka- Felix noflymotion nokho akucaci kahle ukuthi ingxabano isukelaphi.
“Izinkunzi ezimbili azihlalelani esibayeni esisodwa. Bayancintisana kwazise baphinde babe ngo- somahlaya bobabili. Sekube nemihlangano eminingi ngenxa yokuthi bayacebana, omunye athi ngeke akwazi ukusebenza nomunye. Le nto isinomthelela ngisho ohlelweni lwabo. U-flymotion usefana nesichuse kulolu hlelo,” kuqhuba umthombo.
Kuthiwa ngisho kwibika lwalolu hlelo uflymotion akabalwa yize eyingxenye yalo, kubalwa ulesoul nofelix kuphela. “Kwesinye isikhathi uma esebenzela ngaphandle kuye kube nokukhononda ngokuthi akazwakali, aze asho nofelix athi, ‘Angimuzwa lo muntu ukuthi uthini’. Kodwa usphe nonaves bazwakala kahle yize besakazela egoli nokuyinto eshiya imibuzo eminingi,” kulanda umthombo.
Ethintwa uflymotion uthe: “Ufelix ufana nomfowethu, sixabana lokhu okujwayelekile bese siqhubeka nomsebenzi. Akukho okunye engingakuphawula,” kuphetha yena.
Ufelix Hlophe uthe: “Yizinsolo ezibucayi lezo, ngicela ukukunika inamba yokhulumela isiteshi, kangivumelekile ukuphawula,” kuphetha yena.
Okhulumela igagasi FM, ukhulekani Shandu, uthe: “Noma yikuphi, uma abantu besebenza ndawonye kuyenzeka kube khona ukungavumelani ngezinye izikhathi, kodwa lokho akusho ukuthi akusazwanwa. Nakufelix nofly bekuyisimo esinjalo, akusikhona ukuthi abazwani. Imihlangano ihlezi ibanjwa nazo zonke izinhlelo kubhekwa ukusebenza kwazo, akukho lutho oluhlukile ngalokho.”
tzondi@ilanganews.co.za