Ilinyalelwe ngabadlali ibay FC

Kulokoza inhlansi yethemba ngokunyukela kwi-absa Premiership

IYAXHUGA irichards Bay FC ngaphambi komdlalo onzima nembombela United wenational First Division (NFD) onamuhla ngesonto ngo-15h30 emhlathuze Sports Complex, erichards Bay.

ILANGA Langesonto lithole ukuthi ibay FC izokuya kulo mdlalo ngaphandle kukabafana Dlamini noveluyeke Zulu abanezinkinga ngokwahlukana.

Usifiso “Jomo” Biyela ongumnikazi webay FC, utshele leli phephandaba ukuthi udlamini walimala ngesikhathi le kilabhu ibhekene newitbank Spurs.

Nokho uthi amalungiselelo ahamba kahle kakhulu yize bezobhekana nekilabhu enzima kakhulu.

“Kangikholwa ukuthi ukungabi bikho kwalaba badlali abalimele kuzosithikameza kakhulu. Sizimisele ngokubuya namaphuzu agcwele kulo mdlalo futhi ngiyakuqonda ukuthi ngeke kube wumdlalo olula.

"Okuhle wukuthi abadlali babukeka bezimisele ngokwedlulele ejimini ukufela ikilabhu.

“Konke okwenzekayo besingakulindele nhlobo. Kuyakhombisa ukuthi iqembu silakhe ngabadlali abahle.

"Ngokwami bengizibekele umgomo wokulwela ukungena esigabeni esikhulu ngesizini ezayo kodwa uma abadlali bekhombisa ukufisa ukunqoba kayikho into engenziwa kuphela kumele bafakwe umfutho,” kusho ubiyela.

Lesi sikhulu sibuye sanxusa abalandeli bebay FC ukufika ngobuningi babo kulo mdlalo ukuzoxhasa abadlali.

Iroyal Eagles izofika ifana nebhubesi elophayo kwireal Kings emdlalweni WENFD onamuhla ngo15h30 echatsworth Stadium. I-eagles ibuya esibhaxwini esinikwe wuthongathi FC ngeledlule.

I-eagles isembangweni wokungena emidlalweni yokuhlungela ukunyukela esigabeni esikhulu kanti ikings ivika izembe njengoba izokuya kulo mdlalo ihleli emsileni we- log YENFD ngamaphuzu angu-19 emidlalweni engu-21.

Isiyonke imidlalo YENFD enamuhla ngesonto ihlelwe kanje:

Emhlathuze Sports Complex: Richards Bay vs Mbombela United 15h30.

Echatsworth Stadium: Royal Eagles vs Real Kings 15h30.

E-athlone Stadium: Ajax Cape Town vs TS Galaxy 15h30.

Ethohoyandou Stadium: Tshakhuma FC vs Pretoria University FC 15:30.