Welapha imiphefumulo ngohlelo alwethulayo
UMLINGISI ophinde abe ngumethuli wohlelo lwezithandani kumabonakude olusihloko sithi Seng'khathele, ulerato Mvelase, akangabazi ukuthi ukuba ngumethuli walolu hlelo kusahamba endleleni yobizo lwakhe njengoba eyisangoma.
Ngo-2015 lo mlingisi ngaleso sikhathi owayeyintandokazi emdlalweni kamabonakude ihome Affairs, waphumela obala ngohambo lwakhe lobungoma.
Echaza kwelinye lamaphephabhuku ngaleso sikhathi wathi ngaphambi kokwamukela idlozi, ubezizwa esindwa, engaphelele futhi kungathi umhlaba uwuthwele ngamahlombe.
Kuyacaca ukuthi ukungenwa yidlozi kakuyiphazamisanga le ntokazi njengoba isayibambile endimeni yobuciko emidlalweni yeshashalazi, ekulingiseni, nokuba ngumethuli weseng’khathele, okuwuhlelo olugqashula ucu phakathi kwezithandani ezingasahoshelani kahle ngokwemimoya ngenxa yezizathu ezahlukene, olusakazwa njalo ngoMgqibelo ngo-19:00 kusihlwa.
“Ngenxa yokuthi lolu hlelo luthinta kakhulu imizwa, ludinga umethuli ovuthiwe ngokomqondo futhi ongehluleli futhi ozaziyo izingqinamba zokwehlukana nesithandwa sakho.
“Ngiyacabanga ukuthi ngibanika ithemba nesibindi sokudlulisa lokho abasuke befuna ukukusho kophathina babo nokuba yisibonelo sokuthi impilo emuva kokwehlukana iyaqhubeka futhi abantu bayehlukana,” kusho ulerato.
Ukhuluma kanjena nje naye usanda kudlula esigabeni esinzima esasabalala kwabezindaba sokuhlukana nesoka lakhe, usiyabonga “Siyab” Radebe, ongumlingisi futhi abanendodakazi naye.
Akaphumelanga obala ngodaba lwabo nosiyabonga ngaphandle kokuthi umzuzu othi “Sengkhathele” kuyena wafika emuva kokujula, wabona ukuthi usekwenze konke obekumele akwenze kulobu budlelwano.
“Ngikhululekile emoyeni futhi angibambe magqubu. Nenhliziyo iyashesha ukuxola idlulise uma yazi ukuthi ukwenze konke obekumele ukwenze ngaleso sikhathi obusinikiwe nomuntu. Njengengane yedlozi ngikholwa kakhulu ukuthi konke okwenzeka ezimpilweni zethu kunesizathu esikuvulela indlela ethile eya phambili.
“Uma ukulesi simo sokomoya uyazinza kubuwena, uhlale ujabule ngoba uyakwazi ukuqonda ukuthi isimo obhekene naso ngaleso sikhathi futhi sisuke sizodlula.
“Okunye wukuthi uyakwazi nokujabulela impumelelo yomunye umuntu ngoba leso kusuke kuyisikhathi sakhe, nakuwe esizofika ngolunye usuku,” kusho yena.
Uthi iseng'khathele kakusiwo umsebenzi kuyena kodwa yindlela yokwelapha imiphefumulo nokukhipha abantu emaketangweni othando.
“Ngiyacabanga ngokomoya ukuthi beluhlelelwe mina ngoba asikho isikole esikuqeqeshela ukuba ubhekane nezingqinamba zothando kodwa okungenani udinga ukubanjwa isandla ngumuntu oseke wabhekana nalesi simo,” kusho yena.
Uma engekho emsebenzini isikhathi sakhe sangasese usichitha nabantwana bakhe. “Njengomama ngiyazinikela uma kuziwa ekunakekeleni abantwana bami.
“Ave kukuhle ukubona abazali bebambisene ekukhuliseni abantwana babo noma bona bengasenabo ubudlelwano ngoba lokho kukhombisa ukuthi babeka bona phambili. Ngala mazwi kangisho lutho mayelana nosiyabonga - angazikhulumela yena,” kusho ulerato.
Kulo nyaka uthi uphokophelele ekusebenzeni ngokuzikhandla emkhakheni wobuciko ukuphendla indlela yekusasa ezogcina imbeke cababa esitulweni sokuba ngungqongqoshe walo mnyango ngelinye ilanga.