Unkulunkulu akalahlani
“WONKE umuntu unkulunkulu umbekele izibusiso zakhe azozizuza ngokuba alinde, abekezele ngoba usuke engakhohliwe, kepha esamlungiselela okumfanele.”
Lena yingxenye yamazwi entshumayelo enohlonze eyethulwe ngumbhishobhi Sabelo Mdletshe, webandla ilifa Renewal Centre International, eku-28 Stalwart Simelane Street, ethekwini ngesonto.
Bekuwusuku lokubonga unkulunkulu kuleli bandla ngokuthola indawo yokukhonzela emuva kweminyaka lasungulwa nguyena umbhishobhi Mdletshe nowakwakhe, umama Mbhishobhi Thembi Mdletshe nabazalwane.
Indlu yesonto iyisitezi, phezulu kunendawo enkulu okungakhonzelwa kuyona iphinde ibe yindawo yokuhlanganyela nokunye. Asidalulwanga isamba ethengwe ngaso le ndlu.
Inkonzo iqale ngomkhuleko, ikhwaya yebandla yethula izingoma zendumiso, kwangenwa endumisweni maqede umama Mbhishobhi Mdletshe wahola indumiso. Kulandele umbhishobhi Mdletshe ngokwemukela izihambeli, wabe esengena ezwini acaphune kulona encwadini kaduteronomi 6 ivesi lika-12 lapho kufundeka khona kanje: “Xwaya ukuba ungakhohlwa ujehova owakukhipha ezweni lasegibhithe indlu yobugqila.”
Umbhishobhi Mdletshe uqhube wathi: “Unkulunkulu akamlahli umuntu wakhe. Uhamba naye indlela yonke yena acabange ukuthi akamboni futhi akamhlelelanga, kanti usambekele izinto zakhe. Akakuthathi akuyise lapho engazi khona. Abantwana baka-israel wabatshela ukuthi ubakhipha endlini yobugqila nje, ubayisa ezweni loju nobisi.
"Ukuthatha lapha phansi akubeke kwelenyoni. Ungazibukela phansi ukhale ngezinkinga zomsebenzi, kanti umsebenzi wakho kade akubekela wona, lo muntu obekwe kuleso sikhundla ubambele wena, singesakho, akalenzi iphutha.”
Uqhubeke wathi: “Ujesu weza emhlabeni ethunywe ngunkulunkulu ukuzoqeda izinhlupheko zabantu. Uthe kumele abantu bambize unkulunkulu ezinhluphekweni zabo; udinga umuntu olindayo abekezelele isikhathi esihle esizayo.
“Ungadidwa ngabantu bekukhipha ekukholweni kwakho.
Noma yini ehlezi mpumpununu ingagadiwe, amasela ayayithatha, kanti uma usesibayeni sikankulunkulu, uphephile, akekho oyokunyakazisa.
"Sikhumbule ukuthi abantwana bakwa-israel abafikanga ezweni lesethembiso ngosuku olulodwa, kwaphela iminyaka kanjalo nathi kumele sihlalele ethembeni elingunkulunkulu.” Ushumayele kanje abazalwane baze bamphonsela imali. Leli bandla liba nezinkonzo kusukela ngehora lesi-8 kuya kwele-10 ekuseni. Umculo usezingeni eliphezulu futhi kuyanikelwa. knowledge.simelane@ ilanganews.co.za