7. ISOKA LIQONYWA KAKHULU

UMBUZO: NGIYINTOMBAZANE eneminyaka ewu-33, sengithandane nesoka lami iminyaka ewu-19 futhi sinezingane ezimbili. Lingumuntu oqonywa njalo bese liyakhohlwa yimina ngaleso sikhathi lisaqonyiwe. Nezintombi zalo zihlala zingifonela zingithuka, uma ngimtshela athi akahlangene nazo.

IMPENDULO: Angiqondi ukuthi yikuphi ngempela obheke ukuba ngikusize ngakho noma ofisa ukukuzwa kimi njengeseluleko.

Engingakutshela khona nje wukuthi singabantu izinqumo siyazenzela empilweni, umuntu uthatha isinqumo asibona simfanele.

Uma wena uzibona ufanelwe wukuba kube khona umuntu okwenza umata wakhe wokwesula izinyawo, kuyoba yisinqumo sakho lokho. Kodwa futhi uma uthatha isinqumo sokuthi ngeke ukuvumele ukuba umuntu achamele ekhanda lakho, yisinqumo sakho naleso osibona sikufanele.

Engingakusho nje wukuthi kimina kuzwakala sengathi uzimoshela isikhathi ngalo muntu futhi kungathi uluncengile wena lolu thando, yingakho lo mlisa enza kanje.

Awuhlale phansi udle amathambo engqondo, uzibuze ukuthi ngabe yini ekuhlalise kulobu budlelwane, uzibuze ukuthi uhleli ngoba ujabule na.

Uma kuwukuthi ujabule mhlawumbe kulungile ukuba uhlale, kodwa uma ungajabule, mina angisiboni isidingo sokuba uqhubeke uhlale.

* Sicela bonke abafisa ukuthumela imibuzo noma abafisa ukusizakala ezinkingeni ababhekene nazo basebenzise inombolo kawhatsApp ethi 082 070 8034. Sizozama ngakho konke ukuyiphendula imibuzo yenu.