KAYIPHELI INGCINDEZI YEZEMBE KOWE-FSS
ITSHE limi ngothi kumqeqeshi wekilabhu egijima kwi-absa Premiership, ifree State Stars, njengoba kuvela ukuthi uma nje eke wahlulwa namuhla ngesonto ibhantshi lingase ligcwale umoya.
Istars izobhekana nesupersport United kowe-absa Premiership namuhla ngesonto ngo-15h30 elucas Moripe Stadium, e-atteridgeville.
Le kilabhu yasefree State iya kulo mdlalo nje, izinto kaziyihambeli kahle njengoba ibalwa namakilabhu angase agengcwe yizembe.
Leli phephandaba lithole ngomthombo ukuthi umqeqeshi wale kilabhu, unikola Kavazovic, angase aphelelwe yiphalishi uma engase ahlulwe yisupersport namuhla.
“Izikhulu azijabulile neze ngemiphumela yakamuva, ukudlala ngokulingana nepolokwane City neblack Leopards ekhaya akwehlanga kahle neze kubaphathi bekilabhu.
"Kungenzeka axoshwe uma engahlulwa yisupersport.
"Into engamsindisa wukuthi abanikazi bekilabhu bakhala ngokungabi bikho kwabaqeqeshi abanohlonze emakethe, bonke banamakilabhu abawaqeqeshayo,” kusho lo mthombo.
Leli phephandaba lishayela uransie Mokoena oyimenenja jikelele yefree State ngalolu daba, uthe beyikilabhu basameseka umqeqeshi wabo.
Uthi angeke baxhamazele yize bengajabulile ngesimo ikilabhu ekusona.
“Into emqoka kithina njengamanje wukunqoba lo mdlalo wesupersport ukuze sibaleke kule ndawo embi esikuyona.
"Ithemba asililahlile, sizolivika izembe,” kusho umokoena.
Komunye umdlalo we-absa Premiership, iblack Leopards izobhekana nechippa United namuhla ngesonto ngo-15h30 ethohoyandou Stadium, elimpopo.