Ukhipha okujulile ngempilo yakhe uzodwa
Uhlelo lukamabonakude luzoqala ngombasa
SEKUQINISEKISIWE ukuthi luyaqala ukusakazwa ngenyanga ezayo uhlelo lukamabonakude olukhuluma ngempilo kazodwa Libram, odume ngelikazodwa Wabantu. Yize noma abaningi bezitshela ukuthi bazi konke ngalo mdansi, ozakhele igama ngokujayiva egqoke izingubo eziveza umzimba, kodwa uthi kuningi abalandeli bakhe nabantu baseningizimu Afrika abazokufunda ngaye kulolu hlelo. Luzosakazwa esiteshini, imoja Love, ku- channel 157 etholakala kwidstv, kusukela mhlaka 2 kumbasa (April) ngo-9:30 ebusuku.
Ekhuluma NELANGA Langesonto uzodwa Wabantu, uthi kulolu hlelo abantu bazophinde bathole nethuba lokuqonda kahle ukuthi kungani eyilokhu ayikho.
“Abantu abaningi bangazi njengomuntu ongehlulwa yilutho empilweni nongesabi lutho kodwa kulolu hlelo bazothola ithuba lokungibona ngikhala nokuthi yini kahle hle engithunuka inhliziyo,” kusho yena.
Le ntokazi esayindwe ngaphansi kwesitebele sikamthokozisi Khathi, owaziwa ngelikadj Tira, ithi kulolu hlelo izobonakala futhi ihleli nanodokotela wengqondo.
Ngasekupheleni konyaka odlule leli phephandaba like labika ngezingxoxo ebeziphakathi kwale ntokazi nabesiteshi imoja Love, njengoba bebemshelela ukuba benze lolu hlelo. Uzodwa Wabantu wathi uma befuna ukusebenzisana naye kumele babeke imali engango-r500 000 phansi ngaphambi kokuba emukele isiphakamiso sabo sokusebenzisana naye. Yize noma engabange esafuna ukuveza ukuthi bagcine bevumelene ngamalini njengoba sebeqalile ukuqopha, kodwa uthi imali abavumelene ngayo ujabule kakhulu ngayo.
“Mina ngikhuluma ngemali kuphela, hhayi izinto eziningi. Noma ngingavumelekile ukusho ukuthi sivumelane ngamalini kodwa ngijabulile, yingakho sesiqalile siqopha. Isizini yokuqala izoba neziqephu ezingu-13, kuyobe sekubonakala lapho-ke ukuthi eyesibili ingenzeka yini,” kusho yena. Uthi ngaphandle kwezihlobo nabangani, abantu bazophinde babone ubudlelwano bakhe nesoka lakhe, elinguben 10, untobeko Linda, osebenza kwelinye lamabhange ethekwini.
“Ngikhethe ukuba naye ngimvulele ithuba lokuba azakhele imali ngoba ngimfisela okuhle. Ngiyafisa ukuba naye akhule, uma efuna ukuzithengela umuzi abe nawo amandla okwenza njalo. Usengikhombisile ukuthi unami ngoba engithanda, akalandeli udumo noma imali yami ngoba sesinesikhathi eside sithandana,” kuqhuba uzodwa.
Ngenyanga edlule le ntokazi ike yaba sematheni ngokuthenga ibhokisi ethe libiza u-r150 000, athi uyongcwatshwa ngalo ngoba engafuni ukuba ngelinye ilanga kuthiwe ufe yangabakhona imali yokuba angcwatshwe. Nakulona lolu hlelo uthi kuzovela ekhuluma ngokuthenga kwakhe leli bhokisi, echaza futhi nokuthi kungani echithe imali eningi kangaka kulona.
“Bengingayichitha leyo mali ngithenga izimpahla ezinamagama abizayo njengoba kwenza abaningi kodwa ngikhethe ukuzithengela ibhokisi ngoba imali yami,” kusho yena.
Umnu Aubrey Tau, oyiceo kwamoja Love, uvumile ukuthi ngenyanga ezayo bazoqala basakaze lolu hlelo, wathi bagcine bevumelene ngesamba esithile nozodwa Wabantu kodwa wangathanda ukusidalula.
“Kakubanga wu-r500 000 ayethi uyawufuna kodwa sivumelene ngemali naye ajabulile ngayo,” kusho umnu Tau.
Uzodwa uthi kunosaziwayo ajwayelene nabo abazovela kulolu hlelo kodwa luzogxila empilweni yakhe nesoka lakhe, yindodana yakhe nomsebenzi wakhe.