UDJ AKENEME NGOKUJIVAZWA NGUKHUZANI
USHAQISWE wukujivazwa ngukhuzani Mpungose engomeni UDJ wasethekwini osazimisele ngokusebenzisana nalesi silomo sikamaskandi.
UDJ Boonu ogamalakhe langempela nguAndile Chili, uthi nakuba engakayizwa kahle le ngoma etholakala kwi-albhamu kakhuzani ethi “Inhloko Nes’xhanti,” abantu sebemtshelile ngayo. Engomeni esihloko sithi “Ngingangawe,” lapho ukhuzani eshiya angalazi ngambiza ngoMadunudunu nomacingwane, kunezinhlamvu ezithi “uyakhala UDJ Boonu ukuthi selokhu acula nawe akaphindanga wathola umsoco”.
Ekhuluma NELANGA Langesonto uboonu, uthe ngokuzwa ezinkulumeni ezishiwo ngabantu ahlangana nabo, okushiwo ngukhuzani ngaye akwehli kahle. Uthi akazimisele ukungena ezinxushunxushwini ezikhona phakathi kwabaculi bakamaskandi ngoba yena ungudj futhi akekho angeke asebenzisane naye uma ithuba livela.
“Ngeke ngiphawule kakhulu ngoba ngokwazi kwami ubudlelwano phakathi kwami nokhuzani buhle futhi nasemcimbini wami engiwuhlelayo (umlazi Picnic) ngimqashile.
"Ngakho uma kunengoma yakhe engijivazayo, ngiyamangala ngempela,” kusho yena.
Uthi okummangaza kakhulu wukuthi ukhuzani usanda kuxoxa naye ngokwenza ingoma uma kuqala unyaka ozayo. “Ngabe kuyethusa ngempela ukuthi sikhuluma ngokwenza ingoma yena ngale ungifaka ezimpini engingahlangene nazo,” kusho UDJ Boonu, engeza ngokuthi usanda kuhlangana nabalandeli begcokama bazwakalisa ukungenami ngaye.
“Ngithe ngizihambela eworkshop (ethekwini), ngahlangana nabazibize ngabalandeli begcokama bathi mina ngihlebe ngalo kukhuzani. Kungimangazile lokhu ngoba bengingazi bakhuluma ngani ngaphambi kokuba basho ukuthi bezwe ingoma kakhuzani,” kusho yena.
Uthi ngeke asiguqule isinqumo sakhe sokuqasha ukhuzani emcimbini wakhe ngoba akananxa naye futhi uyamhlonipha, kanjalo negcokama nabo bonke abaculi bakamasakandi.
“Ngizimisele ukuba sihlangane naye ukuze ngizwe izinhloso zakhe ngakushoyo engomeni. Ingoma ngisazimisele ngokuyenza naye,” kusho uboonu ethi abaculi bakamaskandi ubakhonzile ngoba bahambisana nohlobo lomculo alwenzayo. Uthi yena wenza i'gqom' maskandi njengoba enza ngesikhathi epika igcokama engomeni ethi “Swidi Wodwa”. Uthi kuyimanje kunengoma aphezu kwayo ezohlanganisa umculi waphesheya noshwi nomtekhala.
“Sengiqede konke nozhao (umculi waphesheya). Sengiyithumele koshwi ukuze babone ukuthi akukho yini abangakwenza kule ngoma,” kusho yena.
Kuyindaba eyaziwayo ukuthi ukhuzani negcokama bayizimbangi emkhakheni kamaskandi.
Eziphendulela ngalokhu ukhuzani, uthe yena ubengagadli kuboonu futhi akananxa naye, ukhona abegadla kuyena ngalokhu abekusho engomeni.
Ubegcizelela ukuthi banobudlelwane obuhle noboonu, wanxusa ukuba lo DJ alalelisise izinhlamvu zengoma ukuze akuqonde kahle abekusho engomeni. lucky.cain@ilanganews.co.za