INDAYI HOMECOMING NGEKE YENZEKE KULO NYAKA
NGEKE ube khona kulo nyaka omunye wemicimbi yobumnandi yaminyaka yonke ngesikhathi samaholide kazibandlela (December), indayi Homecoming Festival, obuba sendwedwe, enkundleni yemidlalo kwanombika.
Lo mcimbi uke waxhaswa wukhozi, kanti kusukela uqala iphephandaba ILANGA beliyingxenye yawo, futhi uxhaswe wumasipala wasendwedwe. Usuwenzeke iminyaka emithathu kusukela ngo-2016.
Ukungabikhona kwalo mcimbi kulo nyaka, kuqinisekiswe nangumsuguli wawo, uhlangulani Msomi, esitatimendeni asifake ezinkundleni zokuxhumana, ebikela abalandeli bawo (umcimbi).
Kulesi sitatimende asikhiphe ngaphansi kwenkampani yakhe, Indayi Communications, uthe akubanga yisinqumo abafinyelele kalula kusona. Uthe basithathe ngemuva kokungaboni ngaso linye nabaxhasi abakhulu. Ube esebonga kubona bonke ababesekile, nakubaxhasi.
Ethintwa YILANGA Langesonto umsomi, uvumile ukuthi impela umcimbi awusekho ngenxa yokuthi kukhona izinto abangavumelananga ngazo nomasipala wasendwedwe, obekuyiwona umxhasi omkhulu womcimbi.
Uthembise ukuthi kungenzeka umcimbi ubuye ngonyaka olandelayo uma kuvela abaxhasi abawuthandayo umbono wendayi.
Udisco Khuzwayo, ongumqondisi we-economic Development kulo masipala, uvumile ukuthi kuphelile ukusebenzisana phakathi kwabo nendayi Communications.
“Inkinga ebesibhekene nayo wukuthi umcwaningi mabhuku ubesithola sinephutha ngokuxhasa indayi ngesizathu sokuthi kayikho into ethinta igama likamasipala. Njengamanje sinomcimbi esizihlelela wona kamasipala ozoba ngomhla ka-22 kuzibandlela, obizwa ngokuthi yindwedwe Music Festival, ozokwenzelwa ensuze Sports Ground.
“Sizoqoka inkampani ezowengamela njengoba besikhiphe isikhangisi. Silindele kube nenqwaba yabaculi,” kuphetha yena.
hlongwaj@ilanganews.co.za