Unyawo olwehlukile kwinyus' ivolume
UMCIMBI waminyaka yonke wokhozi FM, ILANGA Langesonto ebelibike ngawo ukuthi izinhlelo zawo zakulo nyaka zibukeka zicikizela, sekuqinisekisiwe ukuthi uzoba khona. Nokho okucacayo wukuthi uhlelo lwawo aluzukufana nolwangeminye iminyaka edlule.
Okhulumela ISABC, ummoni Seapolelo, utshele ILANGA Langesonto ukuthi izinhlelo zomcimbi inyus’ivolume ziyaqhubeka. Ngolwesine kuleli sonto izinhlelo zalo mcimbi zethulwe emthonjaneni Sports Centre, emelmoth. Umcimbi uzoqala ngolwesine mhla ka-12 usongwe mhla ka-15 kwephezulu kuyona le ndawo.
Okwehlukile kulokhu wukuthi inyus’ivolume izokwenzelwa emelmoth kuphela, kanti phambilini ibiyenzelwa ezindaweni ezahlukene. Kubikwa ukuthi umcimbi uzovulwa ngomkhuleko womama ngolwesine, kanti ududu Khoza ( osesithombeni) uzobe esakazela khona lapha bukhona. Ngosuku olulandelayo kuzoba nohambo luka-5km okuhloswe ngalo ukulwa nokubulawa kwabesifazane nezingane.
Kuzophinde kube nemidlalo eyahlukene, kanti ngomgqibelo kuzokuba nedili lomculo okuzonandisa kulona abaculi abahlukene. Umcimbi uzosongwa ngenkonzo ezokuba ngesonto, lapho usbu Buthelezi ezosakaza bukhoma uhlelo lwendumiso.
Ukhozi luzosakazela kule ndawo ngesikhathi kuqhubeka lo mcimbi. Usibonginkosi Biyela oyimeya yasemthonjaneni, uthe bajabule ngokuthi ukhozi luphinde lwabanika ithuba lokusingatha lo mcimbi.
Unkz Sbongi Ngcobo, ongumphathi siteshi obambile wokhozi, uthe Inyus’ivolume ibalulekile kubalaleli balo msakazo ngoba bathola ithuba lokuzibonela bukhoma abasakazi ababathandayo.
Phakathi kwabasakazi abebehambele umcimbi wangolwesine, u-irvin Sihlophe, unonhlanhla “Mdonso” Ngcobo, uphindi P onekhono lokucula.