Uthole umazisi obenengcindezi ngewele lawo
SIJABULISE okwengane encane isalukazi sasebamshela, endwedwe, unkz Bellina Hlongwa (77), obese kuphele iminyaka eminingi sinenkinga kamazisi obekuvela ukuthi unezinombolo ezifana nezomunye umuntu ohlala e-adams Mission, ethekwini.
Unkz Hlongwa bejatshuliswa wukuthi igcine ixazululekile inkinga yakhe, wawuthola umazisi wakhe ngemuva kokungenelela KWELANGA
Langesonto, yisikhulu emnyangweni wezasekhaya ehhovisi elisemngeni, ethekwini nehhovisi likandunankulu esifundazweni.
Inkinga kamazisi ibisimhlukumeze kakhulu unkz Hlongwa njengoba ubengakwazi nokubhalisa umshado wakhe ngokusemthethweni.
ILANGA Langesonto labika ngodaba lukankz Hlongwa ezinyangeni ezimbalwa ezedlule.
Leli phephandaba lathola ukuthi nakuba ubenabo omazisi abane, abashaye eminyakeni edlule ngokwehlukana, inkinga bekuwukuthi bonke bebebuya benezinombolo ezifana nezomunye umuntu okuthiwa ngowase-adams Mission, ethekwini.
Le nkinga yakhe kamazisi yaqonga kakhulu ngesikhathi sekutholakala ukuthi kwalowo muntu useshonile, kwaba wukuthi naye kuthiwa useshonile. Lokhu kwaphazamisa impilo yakhe kakhulu njengoba wayengasakwazi ukuthola isibonelelo sikahulumeni ngendlela, wangakwazi ngisho ukuyovota.
Inkinga yakhe ayiphazamisanga yena nje kuphela, kodwa iphazamise umndeni wakhe wonke. Nakuba eshadele kwamkhwanazi, kodwa ngenxa yokuthi ubengakwazi ukubhalisa umshado wakhe, kwaphoqa ukuba zonke izingane zakhe zingabizi isibongo sikayise kwamkhwanazi, kodwa zibize isibongo sasekhaya konina.
Ngesonto eledlule unkz Hlongwa ubemukela umazisi wakhe omusha oyikhadi elinezinombolo zakhe. Ezibongela egameni lomndeni uthe: “Ngibonga kakhulu kubona bonke abangilekelele ukuba ngithole umazisi omusha. Ngibonga angiphezi kwiphephandaba ILANGA Langesonto ngokwenza isiqiniseko sokuba lilandela udaba lwami kuze kufike ekugcineni.
"Umnyango wezasekhaya nehhovisi likandunankulu, ngicela enikwenze kimina nikwenze nakwabanye,” kuphethe yena.
Unkk Fikile Queen Mnembe, wehhovisi likandunankulu uthe: “Sibonga kakhulu ukubona umama ethola umazisi wakhe. Thina njengezisebenzi zikahulumeni sizibophezele ekubeni sizwe zonke izikhalo eziqondene nomphakathi wakithi, bese siwusiza lapho ushoda khona.”
Umnu Mbongeni Magagula, oyiphini lomqondisi ehhovisi lomnyango wezasekhaya, emngeni, ukhuthaza abantu ukuthi uma kwenzeka beba nezinkinga emahhovisi omnyango wezasekhaya abasuke beyofuna kuwona usizo, baqinisekise ukuthi bacela umphathi walelo hhovisi ukuze bathole usizo ngokushesha. hlongwaj@ilanganews.co.za