ABE-KWAITO BETHULE OWOKUDODISA INTSHA
IQEMBU lomculo we-kwaito elaziwa ngoshakes nosingil, lethule umkhankaso wokudodisa abafana abasebancane.
Leli qembu elinamalungu ayizelamani lethule lo mkhankaso, obizwa ngeboyz To Men, ngokubambisana nesanlam Centre Empangeni, isivanada World Peace Foundation NESAPS. Ekhuluma NELANGA Lange
Sonto, ushakes uthe bakhethe ukuqala umkhankaso walolu hlobo ngenxa yokubona kwanda isihlava sokuhlukunyezwa kwabesifazane kuleli. Uthe balandela isisho esithi ugotshwa usemanzi.
“Izigameko eziningi zokuhlukunyezwa kwabesifazane zigilwa ngabesilisa asebekhulile. Okusifikele thina wukuthi kungenzeka ukuthi laba abesilisa abagila lo mkhuba abakutholanga ukudodiswa ngendlela efanele besakhula. Ngokuqala lo mkhankaso sisiza isizukulwane esizayo,” kusho ushakes.
Uthi imizi eminingi kuleli yehlukene kangangokuba ezinye izingane zikhuliswa ngaphandle koyise.
“Ngalo mkhankaso sizoba yisibonelo futhi sikwazi nokubiza abesilisa abaqotho ukuba bazokhuluma nabafana ngendlela okumele babaphathe ngayo abesifazane,” kusho yena.
Uthe nakuba lo mkhankaso bewethula empangeni kodwa bazimisele ukuba usabalale, besebenzisana namanye amaciko ahlukene ngokuhambela izikole, bethula izinkulumo kwesinye isikhathi baze babathathe abafana abancane baye nabo enkambini yokubadodisa.
Uqhube ngokuthi lo mkhankaso uzoqala ngonyaka ozayo uma sekuvulwa izikole njengoba bezimisele ukusebenza nezikole ezahlukene. Ushakes nosingil banenkampani, igalawela Music Productions, kanti basanda kukhipha ingoma ngokuhlanganyela nodanger wodumo lwebig NUZ esihloko sithi, “Khon’intengibambile”.