LUYA ENKANTOLO OLOMBANGO WOBUKHOSI BAKWAMDLULI
LUYA enkantolo olombango wobukhosi besizwe sakwamdluli, enyavini, emkhambathini njengoba kuvela ukuthi obeyinkosi umnu Sikhosiphi Mdluli uselufake emthethweni udaba lokudilizwa kwakhe kulesi sikhundla.
ILANGA Langesonto libikile ngesonto eledlule ngalo mbango oshisa phansi emndenini wakwamdluli. Umbango uphakathi kukandlunkulu uthabisile Mdluli oyinkosikazi yenkosi eyakhothama unyangayezizwe Mdluli, obanga nomnu Sikhosiphi Mdluli, ongumfowabo wayo inkosi eyakhothama.
Ngemuva kokukhothama kweNkosi unyangayezizwe kubikwa ukuthi umndeni waqoka usikhosiphi ukuba angene esihlalweni somfowabo. Uhlale kulesi sihlalo isikhathi esilinganiselwa eminyakeni ewu-17 ngaphambi kokuba undlunkulu abuphosele inselelo ubukhosi bakhe.
Undlunkulu kubikwa ukuthi wabe esegunyazwa wumnyango wezokubusa ngokubambisana nobuholi bomdabu Kwazulu-natal ukuba ahlale esihlalweni njengebamba bukhosi, kwazise ikhona indodana okubikwa ukuthi yiyo efanele ukuthatha isikhundla.
Kumanje sishubile isimo esizweni njengoba sekukhona nababulewe okukholakala ukuthi ukubulawa kwabo kuhlobene nalo mbango, kanti nondlunkulu useze wabaleka, waya ekubhaceni.
Echazela ILANGA Langesonto ngesinqumo sokuyisa udaba enkantolo umnu Mdluli, uthe: “Ngifuna umndeni wami ungichazele phambi komthetho ukuthi kungani wadlala ngami. Njengoba umndeni uthi yimina inkosi ngifuna bakusho phambi kwenkantolo lokho.
“Umndeni usuyitholile incwadi (ewubizela enkantolo), nondlunkulu ngokunjalo. Njengoba udaba ngilufake enkantolo yingoba ngikholwa wukuthi kukhona izinto ezingenziwanga ngokomthetho. Ngifuna inkantolo icacise ukuthi yimi inkosi noma ngundlunkulu obambele ingane yakhe.”
Okhulumela umndeni umnu -Alson Mthokozisi Mdluli uvumile ukuthi udaba luya enkantolo.
“Impela udaba luya enkantolo kodwa ngicela uthinte inkosi usikhosiphi ngoba mina ngeke ngikwazi ukunaba kahle ngenxa yokuthi asikahlangani siwumndeni,” esho.
Undlunkulu uthabisile ukuqinisekisile ukuthi uyitholile incwadi embizela enkantolo.
“Ngiyitholile incwadi, ngayidlulisela emnyangweni wakwacogta. Mina angilwi namuntu ngicele umnyango ukuba ungisize ungibuyisele okungokwami nebala umnyango wenzenjalo,” kugoqa yena.