I-DA IFUNA IZIMPENDULO KUNGQONGQOSHE
IQEMBU eliphikisayo ephalamende idemocratic Alliance (DA) lithi lifuna ukwazi ukuthi ungqongqoshe wamaphoyisa umnu Bheki Cele ubevakashele owayengumengameli umnu Jacob Zuma njengongqongqoshe noma njengelungu lesigungu esiphezulu SE-ANC.
Umnu Cele uvakashele emzini kamnu Zuma osenkandla ngolwesine kepha wangaphumela obala ngezizathu zokuvakasha.
Umhlangano othathe amahora amathathu phakathi kukamnu Zuma nomnu Cele ushiye imibuzo kwabaningi. Kumanje IDA ifuna izimpendulo zokuthi kungabe umnu Cele waya enkandla ngokobuphoyisa noma njengelungu lesigungu esiphezulu.
Unkz Natasha Mazzonne weda uthi: “Uma kungukuthi kwasetshenziswa imali yomphakathi, leyo mali kumele ibuye futhi nezizathu zomhlangano kuphunyelwe obala ngazo.”
Yize umnu Cele engazange aphumele obala ngalo mhlangano kepha ngolwesihlanu uthe kakukho okungalungile ngalo mhlangano. Wathi bakhulume ngezinto eziningi, wanikeza nomnu Zuma ithuba lokukhuluma ngezinto ezingamphathi kahle.
Ngolwesihlanu ukuhlabile ukugxekwa kwakhe ngokuthi usebenzise izimoto zikahulumeni ukuvakashela enkandla, wathi bekufanele asebenzise i-uber yini?
Lokhu kuvakasha kuza ngesikhathi lapho umnu Zuma ebhekene khona ngeziqu zamehlo nengalo yomthetho, okuyilapho ekwenze kwacaca ukuthi akazimisele ukusebenzisana nekhomishana kazondo.
IZIBALO ZOBUGEBENGU
Ngawo ulwesihlanu umnu Cele ukhiphe umbiko wezibalo zobugebengu esigamini sesithathu sonyaka, okhomba ukuthi kusukela ngoMfumfu (October) kuya kuzibandlela (December), izinga lokubulawa kwabantu lenyuke ngo-6,6% eningizimu Afrika.
Umnu Cele uthe lezi zibalo azivezi isithombe esihle, okubaphoqayo bengamaphoyisa ukuthi babhukule. Kubikwa ukuthi uma kuqhathaniswa nesikhathi esifanayo onyakeni ka-2019 kusho ukuthi senyuke ngo-389 isibalo sabantu ababulewe.
Esifundazweni impumalanga kubikwa ukuthi senyuke kakhulu isibalo, ngo-13,7% uma kuqhathaniswa nezinye izifundazwe, kanti elimpopo, enorthern Cape naseNorth West kubikwa ukuthi zehlile izibalo zezigameko zokubulawa kwabantu.
Amacala athinta ucansi wona kubikwa ukuthi anyuke ngo-5%. Umnu Cele uthe bawu-12 218 abantu abadlwenguliwe kusukela ngoMfumfu kuze kube wuzibandlela.
Esiteshini samaphoyisa sasenanda, esasemlazi, nesaselusikisiki e-eastern Cape, kulapho kubikwe khona izigameko eziningi zokudlwengula uma kuqhathaniswa nakwezinye izindawo.