Izishaya isifuba IRBM ngokuvelela kwayo
Income ukubambisana kwezisebenzi neziphathimandla idla ubhedu ezinkampanini ezenza kahle
IRICHARDS Bay Minerals (RBM) ithi ukubambisana phakathi kwezisebenzi zayo neziphathimandla yikho okuyenza iphumelele njengoba isanda kuhlomula ngomklomelo wokuba ngumqashi ovelele.
Le nkampani yezimayini isanda kuklonyeliswa ngalesi sicoco yiTop Employer Institute of South Africa, osekungokwesihlanu iminyaka ilandelana.
Unkk Bridget Ngobese oyimenenja yophiko icapabilities Development and Training ERBM, echaza ngokuhlomula kwabo ngalo mklomelo, uthe indlela ababhekelela ngayo izisebenzi zabo, kanye nokunakekela umphakathi abakhelene nawo yikho okubenza bahluke kwezinye izinkampani.
Uthe kuye kuqhathaniswe izinkampani kubhekwe eyenza kangcono.
“Ukufika kobhubhane lwecovid-19 ngonyaka owedlule kuphoqe ukuba sishintshe indawo esisebenza kuyo ukuze sihambelane nesimo.
"Bekumele kuqhanyukwe nezindlela ezintsha ukuze siqhubeke nokusebenza, yilaphoke la sifike sahluka khona. Ngokubhekelela indawo yokusebenza, izikhathi zokusebenza nendlela esisebenza ngayo, sikwazile ukuhambisana nemigomo yokuqhelelana ebekiwe. Ngaphezu kwalokho besiqinisekisa nokuthi izisebenzi zethu siyazigqugquzela ukuba zizigcine ziphilile ngokudla okunempilo, ukuzivocavoca nokuzivikela.
"Nezobuchwepheshe zidlale indima enkulu - abanye bebesebenzela ekhaya, izikhathi zokusebenza zashintshwa.
"Kanjalo nalabo abanezifo ezibabeka engcupheni yokuqiniswa yicovid-19, senze izindlela zokuba basebenzele emakhaya ngoba besingafuni ukuthi kube nesisebenzi esizosiswela ngenxa yobudedengu - yize kunjalo beziqhubeka ziholelwa umholo ogcwele,” echaza.
Uthi kabagcinanga nje lapho, kepha baqhubekile bafaka isandla nasemiphakathini eyakhele le nkampani, bayilekelela ngezifonyo, ama- sanitizer nokudla.
Ngaphezu kwalokho, uthi IRBM inezinhlelo zokusiza abafundi ngokubanika imifundaze. “Siphinde sibe nohlelo lokugqugquzela abesifazane ukuba bangene emikhakheni ebigcwele abesilisa kakhulu phambilini.
"Sinika abesifazane abaphuma kumatikuletsheni akade befunda i- maths ne- science ithuba lokuba yingxenye yethu, sibafundisa ngezezimayini.
"Uma beqeda kulezi nyanga eziwu-18 okusuke kuyi- theory nama- practicals, sibanika ithuba lokufaka izicelo zokusebenza ngaphakathi enkampanini,” kuphetha yena.