UQALA UKUGXILA KWEZOKUPHEKA
Uthi ngenxa yokukhula nokwanda kwabantu ababekhonze ukuphekelwa nguyena, yilapho akhetha khona ukwenza izifundo zokupheka e-international Hotel School.
“Lapha ngase ngifuna ukuthola kabanzi ngalo mkhakha nangebhizinisi lawo njengoba ngase ngiqalile ukwenza ibhizinisi lokupheka, kodwa ngingenalo ulwazi olugcwele ngalo ngaphandle kokupheka nje,” kusho yena.
Ngemuva kokuphothula izifundo zakhe, yilapho ekhethe ukuvula isitolo sokudlela esiqale saba seglenwood ngaphambi kokuba sifudukele emgwaqweni wodumo uflorida, ethekwini.
“Ngenxa yezingqinamba ebezikhona ngiyisitolo esincane esisesisha siqhudelana nezinye kulo mgwaqo, bekunzima njengoba ngigcine sengiza la kulillian Ngoyi,” kusho lo somabhizinisi.
Uthobile echaza ngokudla abantu abazokuthola kulezi zitolo ezinkulu (zakwaspar), uthe okwamanje kuzoba yizitshulu okubalwa kuzo ibutter Chicken, ilamb Curry, inhloko, i-oxtail azimisele ukuyiqala ebusika ne- rice.
Uthe lokhu kuzokwenza umsebenzi womuntu ohlale ematasa ube lula njengoba ezokwazi ukuthenga isitsha afike asifudumeze, bese eyadla ngaphandle kokuchitha isikhathi esiningi emabhodweni.
Uqhube ngokuthi okuhle ngalokhu kudla kwakhe wukuthi uma kuhleli kwi- freezer kungahlala isikhathi eside, ngaphandle kokulahlekelwa wumsoco nobumnandi bakhona.
Uthe useziqalile izingxoxo nezinye izitolo ezinkulu kanti kuyathembisa njengoba nakwamanye amadolobha nakwezinye izifundazwe, sezikhona izicelo.
Uthobile uthe nakuba enentshisekelo yokuthi ukudla kwakhe kusabalale kulona lonke elakuleli, kodwa ngeke avumele noma yisiphi isitolo sidayise ukudla kwakhe, njengoba naye ezobheka ukuthi siyahambisana yini nezinga azimisele ngokuthi ukudla kwakhe kuhlale kukulona.
Ngaphandle kwesitolo sokudlela, uthobile uphinde aqashwe nasemicimbini eyahlukene yokupheka, okubalwa eyezinkampani, ekahulumeni, imishado neminye.