Ucacisa eyokushiya ihostela
CACISA ngokuphuma kwakhe emdlalweni ihostela umjostana “Pastor Mjosty” Mbhele (45), oveza nokuthi lo muntu obonakale ebulawa elingisa indawo ka-2litre bekungaseyena, njengoba abaningi becabanga ukuthi bekunguye kwazise nguye obeyilingisa.
Kuleli sonto emdlalweni kamabonakude ihostela season 2, osakazwa esiteshini sikamabonakude esikhokhelwayo imzansi Magic, channel 161, ngesonto kusihlwa, kumangale abaningi kubulawa u-2 Litre, okuyindawo ebilingiswa nguMjosty.
U-2litre ubulawe ngumasikhakhane ogama lakhe langempela ngu-andy Mnguni, emshaya ngesitini. Ukufa kuka 2Litre kalula kanje, kumangaze abanye bababukeli balo mdlalo, abanye bekhononda ezinkundleni zokuxhumana bethi ngeke u-2litre abulawe yisitini esisodwa nje.
ILANGA Langesonto libe selixhumana nomjosty ukuzwa kabanzi ngokufa kwakhe emdlalweni.
Elandisa leli phephandaba uthe: “Impela sengiwushiyile lo mdlalo. Empeleni abantu babone manje kodwa mina ngagcina ukuqopha ngolwezi (November). Akukho ukuxabana okuphakathi kwami neblack Brain.
“Ngithole amadlelo aluhlaza ebengingeke ngiwayeke. I-hostela umdlalo omkhulu impela kodwa akuwona owami, unabanikazi bawo. Lokhu engiyokwenza ngokwami. Ngithole ithuba lokuba ngiqophe umdlalo wamahlaya ozokhonjiswa kumabonakude kanye ngesonto ebusuku.
“Okuningi okuthinta wona ngeke nginabe ngakho ngoba abanikazi bawo bathe bacela ukuthi kube yibona abakhipha imininingwane uma sebebize isithangami sabezindaba.
“Njengoba kunokudideka kubantu yindlela engiphume ngayo, inkinga idalwe yibona abeblack Brain. Bengibatshela ukuba sishuthe iziqephu zokuthi ngiphume bona bathatha kancane ngaze ngaba matasa. Bagcine sebethatha omumye umuntu bemenza mina, bamgqokisa izingubo zami bambulala.
“Ngicabanga ukuthi iyona into edale abantu bahlokoma ezinkundleni zokuxhumana.”
Uveze ukuthi lo mdlalo wamahlaya amatasa ngawo uzobe udlalwa ngolimi lwesizulu esiphelele. Yimina umdidiyeli omkhulu futhi uqoshwa inkampani yami ISMM Project.
Uroby Corwie ongumphathi omkhulu enkampanini iblack Brain (Production Manager) ucele ukuba abuye afonelwe.