KUDUTSHULWE IKHEHLA (79)
KWEMBULWA kwembeswa ekhehleni elineminyaka engama-79 elidutshulwe lalimala lizama ukuvikela abazukulu ezigebengwini.
Lesi sigameko senzeke KwaMzwilini, KwaMaphumulo, lapho leli khehla lidutshulwe amahlandla amathathu ngabasolwa. Kuthiwa kwenzeka lokhu, uMnu Mandlakayise Mdanda ubesendlini ebuya ukuyokukha amanzi nomkakhe, uNkk Cecilia Mdanda (72).
Kuthiwa babuye endlini bazithela phezu kwabasolwa begcwele indlu, babaphoqa ukuba bakhiphe imali. Sebeyitholile imali kuthiwa babe sebethatha abazukulu bakhe ababili.
UNkk Mpilenhle Shabalala, uthi uyisemkhulu uhlala nabazukulu njengoba bona besebenza eThekwini.
“Imvamisa sinenkinga yokuphela kwamanzi kule ndawo, kwesinye isikhathi ayaphela aze abuye phakathi kwamabili. Ngosuku lwesigameko umkhulu nogogo bavukile bayowakha kwazise abengekho.
"Sebebuya bengakangeni endlini babone kucisha ugesi endlini kwabe sekuqhamuka amadoda amabili abangawazi abakhomba ngezibhamu afuna imali.
"Ugogo ubanikeze u-R800 abenawo. Abe esedlulela egumbini obekulele kulona izingane, eneminyaka eli-13 nemibili ubudala.
"Bazame ukuthatha izingane kodwa umkhulu wabalwisa. Siyacabanga ukuthi bebehlose ukuyozidlwengula izingane kodwa umkhulu wangenelela wenqaba nazo, bahilizisana nezigebengu. Zibe sezimdubula amahlandla amathathu ngaphambi kokubaleka," kusho yena.
Uthi uyisemkhulu uphuthunyiswe esibhedlela esesimeni esibucayi njengoba engakhulumi. Uthi kumanje bahlalele ovalweni kwazise izigebengu zibonile ukuthi kubo kuhlala abantu asebekhulile.
“Ugogo wethukile nathi siyesaba. Asazi noma abakwenzile bazokuphinda yini. Siyethemba ukuthi amaphoyisa azolusukumela lolu daba, baboshwe abantu abenze lokhu,” kusho yena.
Uthi bayafisa kungenelele ungqongqoshe wezokuPhepha koMphakathi, uMnu Mxolisi Kaunda, ngoba abawethembi amaphoyisa endawo ngoba sekukaningi umphakathi ukhala ngabafana abancane abaphatha izibhamu kodwa amaphoyisa awazisukumeli izikhalo zomphakathi.
Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko wathi kuvulwe icala lokuzama ukubulala kanye nelokubamba inkunzi kuhlonyiwe.
Uthi okwamanje bekungakaboshwa muntu.