I-ARROWS ISIHALELA IPIRATES ETHEKWINI
UYAQINA umkhankaso weLamontville Golden Arrows wokuqeda indlala yezicoco KwaZulu-Natal ngokunqoba iNedbank Cup.
Abafana Bes’thende badlulele kuma-semi final alo mqhudelwano bewashisa ijezi iPlatinum Stars ngo-1-0 wegoli likaMusa Bilankulu ngoMgqibelo ntambama ePrincess Magogo Stadium, KwaMashu.
Inkulumo yakamuva kaClinton Larsen ocija i-Arrows, yokufuna lesi sicoco eLamontville isigijima nasemithanjeni yabalandeli bale kilabhu abazwakalise ukuthi sesifikile isikhathi sokuthi yelanywe iMTN8 enqotshwe yile kilabhu ngowezi-2009.
Bebehalela ukutonyulwa ekhaya neKaizer Chiefs kwi-semi final kodwa iziMpofana zakhishwa yiSuperSport United ngo-5-3 wamaphenathi emdlalweni ophele kungu-1-1 eFNB Stadium, eGoli.
Abanye abebehleli neLANGA kubukwa i-Orlando Pirates ihlula iBloemfontein Celtic ngo-2-1 kwenye yezindawo zobumnandi eThekwini, bazwakalise ukuthi ukuhlangana nayo kungaba kuhle esigabeni esilandelayo eThekwini.
Bazeseka ngokuthi sekunesikhathi eside kugcine ukuba nomdlalo omkhulu wenkomishi eThekwini. I-Arrows ineqholo nje, ikhiphe kwiLast 16 iMamelodi Sundowns ebithishwa ukudla lesi sicoco.
Le nkulumo yabalandeli be-Arrows ifakazelwe nguNkosingiphile Gumede ongunozinti wale kilabhu. Uthe uhalela ukuthi baqhathwe ne-Orlando Pirates kowe- semi final. Lo nozinti uthi uhalela iBucs ngoba iyikilabhu enkulu okuzokwenza ingene ensimini inengcindezi kwazise izinto kaziyihambeli kahle kule sizini. UGumede ukugcizelele kuleli phephandaba ukuthi uLarsen usifuna ekhabetheni le-Arrows lesi sicoco.
Uncome lo mqeqeshi ngokuba namaqhinga aphusile okwenza bonke abadlali bahlale befuna ukumdlalela ensimini.
Emuva komdlalo nePlatinum, uNduduzo “Sulu” Sibiya odlala esiswini kwi-Arrows, uthe bajabule ngokudlulela kwi- semi final.
“Bekuyisifiso sethu ukuthi sidlulele kulesi sigaba ngoba besidlalela ekhaya. Sijabule ngoba abalandeli bethu abebeseseka bahambe izinhliziyo zimnandi,” kusho uSibiya.
Enye ikilabhu edlulele kulesi sigaba yiChippa United ehlule iJomo Cosmos ngo-1-0 wegoli likaLerato Manzini ngoMgqibelo eBhayi.
UThabo Mofokeng womNyango WezemiDlalo esifundazweni uthe bayayibongela kakhulu i-Arrows