Bayaveva "omacaphunakusale" ngokwakhiwa kwemixhaso
EZOMPHAKATHI: Bathi yehlisa izinga lemizi yabo
ABHODLA umlilo amalunga omphakathi Kwa-W eMlazi, eningizimu yeTheku ngesenzo sekhansela abalisola ngokugxumeka imizi eyimixhaso eduze kwemizi yomacaphuna kusale.
Abesho ukulidla luhlaza ikhansela lendawo amalunga omphakathi, izolo ngoLwesibili ethi akhathele yilona ngokuzithathela izinqumo ngaphandle kokuvumelana nawo bebe bengamalunga omphakathi beyikhokhela nemizi yabo.
Kusize amaphoyisa ngokuqapha amahhovisi ekhansela okubalwa nonogada benkampani ezimele njengoba umphakathi ubuhlasele ngezinkani kulona ukhala ngoMnu Amond Dladla (ikhansela) uthi wakhe izindlu zomxhaso ngaphandle kwemvume yawo.
Okukhalisa kakhulu umphakathi ngukuthi lezi zindlu ezakhiwe eduze kwemizi yabo bengomacaphunakusale zizokwehlisa izinga lemizi yabo kanti bakhokha imali eshisiwe ( bond) kuyona. Umphakathi uveze nokuthi ukungena kwemixhaso ku- ward 82, kuzokwandisa ubugebengu njengoba isondelene nemizi yabo.
USihlalo womphakathi uMnu Sfiso Dlamini uthi okubacasula kakhulu ngukuthi babone sekwakhiwa izindlu ekubeni bona babecele ukwakhelwa umtholampilo, i-centre ezothuthukisa amakhono entsha nepaki. Uthi okwenza bacele lokhu ngukuthi kwezinye izindawo abasizakali uma beyofuna usizo lwezempilo batshelwa ukuthi mabavakashele imitholampilo esendaweni yabo nokuyikhona okwenze bafaka lezi zicelo nendawo yokuzivocavoca.
“Kuphele isikhathi eside ikhansela kungekho elikwenzayo okuyizethembiso zalo, salibizela umhlangano sizozwakalisa ukungathokozi. Kuthe sisalindele ukuzwa ukuthi kuzoqalwa nini ukwakhiwa kwalezi zinto sabe sesibona sekutheleka ogandaganda uma sibuza lathi ikhansela kwakhelwa abantu abaswele izindlu ekubeni singakaze sivumelane ngalokho. Zakhiwa kanjani izindlu endaweni efana nalena? Thina kasiphikisani nokuba kwakhelwe abantu izindlu kodwa esilwisana nakho ngukuba zakhiwe kule ndawo,” kusho uMnu Dlamini.
Lezi zindlu ezakhiwe zili12 kanti ikhansela uMnu Dladla uthi zakhelwe amalunga omphakathi abebhidlikelwe yizindlu zawo nyakenye kuNcwaba (August) ngenxa yemvula yezikhukhula ezinamandla. Utshele leli phephandaba ukuthi konke akwenzile ubekuyalelwa izikhulu ezingaphezu kwakhe ngoba bekunguhlelo oluphuthumayo noluphakamiswe yimeya. Ukuphikile ukuthi yena akabonisani nomphakathi konke uyazenzela.
“Kunabantu ebebehlala emahholo ngenxa yokungabi nazo izindlu kwase kufika imeya yeTheku uNkk Zandile Gumede yathi kumele kwenziwe uhlelo lwezindlu oluphuthumayo okuyizindlu ezibizwa ngo "Lindela" nebala ngawubiza umphakathi ngiwazisa ngazo wathi awuzifuni.
“Ngiwuhambisile umbiko kwamasipala kwase kuthiwa kuzokwakhiwa izindlu zomxhaso ezisezingeni eliphezulu kodwa kumele kuhlonzwe indawo enesikhala kwase kwenziwa lokho. Imihlangano engiyibambe nomphakathi ingaphezulu kwemihlanu kusukela mhla zinhlanu kuNhlolanja (February). Besidingida nawo zonke izinhlelo ezizokwenzeka,” kusho uMnu Dladla.
Uthi okumqhathe kakhulu nomphakathi ngukuthi ubukade uthi akamise ogandaganda bangaqhubeki nokusebenza washaya phansi ngonyawo ngoba kakuvumelekile ukwenza lokho ngokomthetho abasebenza ngaphansi kwawo. Uveze nokuthi kuvunyelwene ngokuthi izokwakhiwa ipaki sesifakiwe nesicelo ezinhlakeni ezifanele.
“Kunenhlesa yepolitiki kulento. Elesithathu manje lelihlandla ngisesihlalweni sobukhansela ngiyayazi indlela okwenzeka ngayo izinto,” kusho uMnu Dladla.