Akafikanga enkantolo ufakazi
Kukhishwe incwadi yokuba aboshwe
UKUNGAFIKI komunye wofakazi bombuso ecaleni lokudutshulwa kwamaphoyisa amabili aseNanda, enyakatho yeTheku, mhla zingama-22 kuMandulo (September) ngowezi-2015 kwashona elilodwa kudide umshushisi eNkantolo eNkulu yamajaji eThekwini ngoMsombuluko.
Kulesi sigameko kuthathwe izibhamu nomfaniswano wamaphoyisa.
Ukungafiki komunye wofakazi kumenze wadinwa futhi wasala edidekile u-Adv Sasha Jacobs, inkantolo yaphoqeka ukuba ithi gozololo isikhashana besazama ukufonela lo fakazi ogcine engafikanga.
Abasolwa kuleli cala nguMnu Sabelo Mkhize (27), uMnu Lindokuhle Mchunu (19) noMnu Sboniso Khubisa (20).
Babhekene namacala ayi-12 abucayi okubalwa kuwona elokubulala ngenhloso uSgt Vusumuzi Moyana, elokuzama ukubulala uSgt Jabu Jojisa, nelokutholakala nezibhamu ezingekho emthethweni, elokuthumba, elokwephula umthetho wezibhamu nelokukhomba amaphoyisa nge-AK 47.
Inkantolo igcine iphoqeleke ukuba ikhiphe incwadi ephoqa ufakazi obengekho ukuba afike enkantolo kungenjalo angene ezikiti. Icala liyaqhubeka.