UJESU WAFUNDISA UKUTHI UDOTSHWA KANJANI UMUNTU
NGOKUKALUKA 5:1-10
NAMUHLA ake sithole isifundo maqondana nale ndaba lapho uJesu afica khona abafundi bedoba kodwa besenkingeni yokungabambi lutho.
Ukufika kukaJesu kwabasiza ukuba abafundisele khona lapho bebedoba khona ukuthi yini eyayidala ukuba bangabambi lutho. Emuva kokuba sebefundisekile ukuthi kudotshwa kanjani lapho kade beshikile khona ubusuku bonke bengabambi lutho, kwaba yilapho bebamba khona izinhlanzi eziningi kwaze kwagqabuka amanethi.
Okufanele ukuba sikuqaphele wukuthi ukufundiswa kwabo ukudoba izinhlanzi yikho uJesu ayebafundisa ngakho ukuthi abantu badotshwa kanjani besuswa ezonweni beza kuJesu.
Okokuqala nje okufanele ukuba sikufunde wukuthi uJesu ubafice kade sebeshikile ubusuku bonke bedoba kodwa bengabambanga lutho. Kwaze kwabaphoqa ukuba bavele bageze amanethi, okuwuphawu lokuthi kwase kufike lapho bevuma khona ukuthi azikho izinhlanzi lapho bebedoba khona. Esikutholayo wukuthi lapho bebedoba khona bezikhona izinhlanzi kodwa inkinga yayikubo ngoba babengafundisekile ukuthi kudotshwa kanjani.
Kuyo le ncwadi esifunda kuyo, evesini leshumi sicaciselwa khona ukuthi emuva kokufundiswa kwabo nguJesu ukubamba izinhlanzi, wabe esethi kuSimoni: "Ungesabi, kusukela manje uzakubamba abantu."
Ziningi izinto ongagcina uziyekile wathi azikho zibe zikhona, kanti inkinga ikuwe ngokungafundiseki ukuthi zitholwa kanjani.
Kunamazwi ashiwo nguJesu uma esebafundisa ukudoba lapho ethi: Qhubekela ekujuleni, nehlise amanethi enu nibambe. Ngamanye amazwi bebedoba inethi bangayifaki ekujuleni kwamanzi kodwa ihambela phezulu kanti izinhlanzi zisekujuleni nokuyikho okwakwenza ukuba bangabambi lutho.
Uma ungafundisekile ngokudoba abantu ungachithekelwa yisikhathi esikhulu ushumayela ngokunamandla kodwa ukushumayela kwakho kungabuyi nalutho.
Uma singathi ukugudlukela ngasodobeni lolu oludoba inhlanzi ngayinye emanzini, kuba khona ukudla okufakwa ehhukwini leli okuyilo elizobamba inhlanzi emlonyeni ukuze lokho kudla kulisithe iwuku lingabonakali ngoba uma nje ike yalibona ibalekela kude nalolo ludobo.
Ngamanye amazwi kumele abantu abangabadobi babantu bafundiseke ngokudoba abantu ukuthi yini okumele balekelele ngayo udobo ukulwenza luzihehe izinhlanzi ezingabantu abadotshwayo evangelini.
Ivangeli lethu kufuneka libe nakho ukudla okusithe ihhuku ukuze abantu bagijimele ukudla kanti sekungukubanjwa kwabo.
Kufuneka ukuba sifundiseke ngezinto okumele sizenzele abantu emphakathini esiphila phakathi kwawo ukuze abantu babone izithelo zevangeli esibabizela kulo ukuthi kunenzuzo kangakanani ukuphila ngalo.
Empeleni ivangeli lethu kume- le ukuba lingahambeli kude nentuthuko yomphakathi nasezintweni eziyizidingo eziphathekayo noma ezifundisa umphakathi maqondana nokuziphilisa ngaphandle kokuncika kwabanye abantu.
Nakuba ivangeli lethu likhuluma kakhulu ngokuphila okuphakade esibabizela kukho abantu kodwa kumele ukuba ivangeli lethu kube nazo izinto zokulekelela abantu ngempilo yanganeno ngenkathi ibandla lisesemhlabeni, lingakahlwithwa liye empilweni yaphakade noJesu.
Uma ungumdobi wabantu kumele ukuba uzazi izinhlobo zokona uphinde wazi nezimbangela zazo ukuze ukudoba kwakho kungamshiyi endleleni lowo muntu omdobayo.
Uma kungenjalo kulula ukuba abantu esibadobayo baphindele kulawo manzi esibadobe kuwo ngenxa yokuba ingakaxazululeki imbangela yalolo hlobo lokona.
Kunohlobo lwabantu abayizoni ezigqugquzelwa wukweswela, nokuyikhona okubenza bagcine sebephila impilo yokusebenzisa izindlela okungeyizo ukuze babe nento esandleni. Uma ungumdobi walolo hlobo lwabantu kumele ukuba uthi ukhuluma ngendaba yokuthethelelwa kwalowo muntu, uphinde wedlulele ekulungiseni imbangela yalolo hlobo lokona kwakhe ukuze angathi esesizakele aphinde abuyele ezonweni athethelelwe kuzo.
Ukuze ivangeli lethu kube yivangeli elilalelekayo kubantu esibadobayo, sidinga ukufundiseka kakhulu ngezimbangela zokuba abantu babe yilolo hlobo lwezoni.
Abanye ukona kwabo kudalwa yizinto ezibuhlungu nezijulile ezabehlela empilweni kodwa bangazithola izeluleko emuva kwalezo zehlo ( counselling) nokuyikho okubenza baphile impilo yokuziphindiselela kubantu aboniwa yibo.