OMAMA MABAYEKE UKUZENZA OSOKHAYA UMA BENGASEKHO ABAYENI
MHLELI: Wonke umuntu ozelwe uzalwe ngowesifazane kulo mhlaba. Iqhaza lomama kalidingi nakuchazwa ngoba umlando uzisholo wona.
Omama yibona abakwazi ukuphuma beyoqhwisha uma kuwukuthi ikati lilele eziko. Kwesinye isikhathi uthole ukuthi ubaba waphelelwa yitoho noma wadlula emhlabeni kodwa kuba ngumama owenza isiqiniseko sokuba izingane zilala zidlile, zifunde kugcineke nezidingo zekhaya.
Omama laba baphuma emakubo bezogana ukuze bavuse imizi yobaba, ibe nemfudumalo, kuqhubeke ulibo lwalapho aganele khona. Nokho kunento engibuye ngingayithandi ngabanye nendlela abashintsha ngayo inqubo yekhaya. Ngokwesintu ngokunjalo nangokweBhayibheli umuntu wesilisa uyinhloko yekhaya, njengoba noKhrestu eyinhloko yebandla.
Kuyenzeka ubaba wekhaya okuyi- nhloko yekhaya uthole ukuthi usedlulile emhlabeni, bese umama eqhwakela esigqikini sikababa ngokuba ashaye imithetho ephambene nalena ebikade ishaywa ngubaba wekhaya esekhona.
Uma ubaba wekhaya ebengumuntu ongakholwa, egxile enkolweni yesintu noma yamadlozi sukiyane umama esethi yena usesindisiwe, useyakhohlwa yizinto zobumnyama, akasazenzi. Lapho-ke usuke esengenwe yila mabandla osindiso odumo. NgokweBhayibheli la mabandla osindiso kawekho kodwa ngokwezwe akhona.
Umama useguqula izinto-ke njengokuthi layikhaya akusahlatshwa, akusashiswa mpepho kepha sekuguqwa ngedolo kuthandazwe kubhekiswe kuMdali. Uma kukhona ingane yakhe eqhubeka nayo le nkambiso yokukholelwa emadlozini kuthi makayidle ayifele ngoba izinto “zobumnyama” kazisenziwa layikhaya.
Umbuzo wami uthi kanti ukwendela kwenhloko yekhaya koyisemkhulu kusho ukuthi umama sekungowakhe yini lo muzi? Bakuthathaphi omama ukushaya imithetho emizini yobaba? Bakuthathaphi omama ukuguqula inkambiso kababa uma esendele koyisemkhulu? Aze anqumele ingane ukuthi uma ifuna ukuqhubeka nobumnyama, kwazise yena usesekukhanyeni ngokuthi usesindisiwe, mayiphume owayo umuzi.
Kungcono uma ubaba nomama bebevele besindisiwe, ingane kumele iziphumele elayo inxiwa iqhubeke nenkolo yoyisemkhulu. Engingakuzwa wukuba ubaba wekhaya kuthi esengasekho umama useshintsha izinto. Ngithi kungangcono ukuba uthi ezinganeni kangikuvimbeli ukukholelwa emisebenzini yabangasekho kepha mina ningangibandakakanyi.