KUNOKUNGCOLA ESIKUDLAYO SINGAZI
SISAKHULA bekuthiwa uma ubone into engasile ekudleni kakumele umemezele utshele wonke umuntu ngoba uzokona usuku lwawo wonke umuntu. Isibonelo wukuthi uma upheka bese kuqhamuka iphela ebhodweni ongalazi nawe belingene kanjani, kawube usakwazi ukukuthinta lokho kudla.
Uvele uqikileke nje, bethi bayakubuza ukuthi pho wena wangadla uvele uthi usuthi, kokunye uze uchaze ukuthi uzoncenga ngasesinkweni, kanti wena uyazi ukuthi bekunenunu ekudleni. Ngicabanga ukuthi kwakuyimfundiso enhle lena ngoba uma sonke besingakhonjiswa ukudla kusaphekwa baningi kabi abebengagonyuluka. Ngize ngidabukele ovila-voco abathanda ukuhlala, baneswe ngoba ave bewudla udoti, bayavelelwa. Kungcono uma uwuhlobo olufingqa imikhono, usondele ekhishini uzibonele ukuthi into oyidlayo iyisimakanjani.
Kunomuntu ongenqeni ukuthi uma ekwenzela itiye noma amahewu afice impukane phakathi, ayikhethe ayilahle laphaya akuthelele khona kunjalo, uphuze ungazi. Uma ucabanga ubusengaliphuza yini lelo tiye ukube bewazi ukuthi kade kuntanta impukane? Kuhle la ukungazi ngoba kufana nokungaboni. Ngizithandela le genge yomqombothi ngoba inezinhliziyo ezinkulu, kayisheshi igonyuluke. Uma befice okusaphela noma imbuzane intanta kababi na- stress nje, bavele basefe baqhubeke baphuze. Ngake ngayizwa kahle indaba yokungcola kokudla ngowayesebenza e- restaurant ngasho ngathi uma ungaphika nalezi zinto ungagcina ungasadli phela, uzace ube wuthi lokuvungula.
Kwankomishi yetiye ungagcina sewuncamela ukusukuma uzenzele yona ukuze uqinisekise ukuthi izinga lenhlanzeko likuleli zinga olifunayo. Wayexoxa ngokungcola okusemakhishini la silungiselwa khona ukudla, ethi imfaduko yakhona ungafunga ukuthi yisikorobho. Ngiyazi wayesenezele nangehaba kodwa-ke uthi kuyenzeka ukudla kuwele phansi bakucoshe bakubuyisele epuletini bakulethele khona sengathi kuphuma kubhayela ngenxa yokuthi uma bekulahla kuzodonswa emiholweni yabo.
Lukhona nocwaningo olwake lwenziwa lwakhomba ukuthi imfaduko nje sdalo sayo inokungcola okuhlasimulisa umzimba, eyasekhaya neyase- restaurant, kuyafana nje. Bese kuba khona nababulawa wukusa-ke emarestaurant, okuthiwa uma ikhasimende like labathethisa noma laba luhlaza bavele bathimisele amathe ekudleni elisuke liku-odile. Akekho owake wangikhombisa le ngxubevange, yingakho ngingazi noma abantu basuke bezisholo nje bedlala ngami okanye yiqiniso. Kule mihla ngisanda kuzwa kuthiwa omakoti bake banidlise nonke nje emzini uma bebona ukuthi kabathandisiswa kahle.
Empeleni kuthiwa noma ngabe niyamthanda umakoti kodwa akenqeni ukunidlisa enzele ukuba nigamjikeli, abe yigugu kuze kube ngunaphakade. Ingani usuke esaba ukuthi kungenzeka nibe ngoMjike-Joe, nishintshe. Ngiyazesaba lezi zinto, umuntu usezonqena nokudla phela engazi noma umkabhuti usewohlozele imvuthuzana etiyeni noma kwenzekani, uzozibona sewumthanda ukufa nje ekubeni kade ubabaza iconsi ngayizolo kuskwiza. Okungesabisa kakhulu wuhlobo lwezinto okuthiwa abalobokazi basidlisa ngazo thina basemzini.
Kuthiwa kuya ngokuthi umelaphi wakhe uthe akenzeni, kuyenzeka athi akowasha okuzikhinjana zangaphansi bese kuthi amanzi akade ewasha ngawo awaconsisele ekudleni enizokudla nonke nina basemzini. Cabanga! Sithe sizixoxela emakhaya ngamaholidi kwagcina sekuyihlaya ukuthi kukhona nabelaphi abaye bathi omakoti mabophala inkwethu yolimi baphonse ebhodweni, bagovuze baphake bese bona bengadli. Hhawu-ke, bayobe sebemthanda njalo abasemzini. Yimi ngedwa engingazikholwa lezi zinto ezinje noma sibaningi? Kusekuncane-ke ungakamuzwa lo othi yena watshelwa wumelaphi wakhe ukuthi akohwaya izithende zakhe, amakhwapha, yinkwethu olimini, akhale akhiphe nezinyembezi bese ekuxova ekudleni komyeni ukuze ezwe yena. Sies, imihlola enje.
Uma uyile nhlobo enenqwaba yezintombi kusho ukuthi ungagcina udla udoti ophindaphindwe ngesibalo sezintombi zakho, yerrr! Ngizwe kuthiwa nezingane seziyelashwa muva nje ukuze oyise bazithande. Uzwe unina wengane ethi: “Kanginandaba noma mina angangala kodwa uma ethande ingane yakhe ngaphezu kwezinye nje kuyobe kuphelile.” Kuthiwa bona-ke bahlanganisa izinyembezi zengane bese kudliswa uyise wayo ukuze anake leyo ngane kuphela, ezinye azilahle. Nigangile ‘yazi! Kangikholwa wukuthi abelaphi abawu “ngqo” bangavuma ukumataniswa nale mikhuba yokukhohlakala nokufunza abantu ukungcola nensila yenu.